洪嘉豪（Kaho）簽約當歌手時，唱片公司曾希望他改名出道，原因是名字太普通，但遭Kaho婉拒，他揚言會五年內在麥花臣開騷，結果他開了兩場紅館，超額完成，亦給公司一個交代。
這幾年，大家都聽到耳熟能詳的《黑玻璃》，看過他做綜藝，歌手身份但充滿「綜藝魂」，很會搞笑搞氣氛，就像讀書時身邊總有一個叫「嘉豪」的同學仔。
洪嘉豪在紅館舞台上，最觸動觀眾的其中一番說話，是他說從舞台走到觀眾席很短時間，卻用了很長時間由觀眾席走上舞台，他希望世上千千萬萬的「嘉豪」如他一樣，即使擁有最普通的名字，卻可過着不平凡的人生。
《黑玻璃》是洪嘉豪（Kaho）入行七年的代表作，MV在YouTube的觀看次數已突破了一千二百萬，亦摘下《叱咤》十大的肯定，從首度踏上紅館舞台的榮耀，Kaho的每一步都充滿了挑戰與成長，這首歌，不僅是他音樂生涯的里程碑。
最叻首歌唔係自己作
歌手與歌曲的相遇，有時就是一種緣份，Kaho說︰「遇到呢首歌，其實都係運氣，呢首歌個demo擺喺『公海』好耐，可能其他歌手、唱片公司都聽過，冇人揀，但我聽咗半首就confirm要，我問版權公司嘅人，佢哋都唔知點解冇人揀到，當然，你把握到，又要遇到一份琅琅上口嘅歌詞，然後你點去演繹、編曲、宣傳，幫你不停keep住呢首歌熱度。」
這首歌的成功，同時又令Kaho有點失落感，「喺台上唱緊《黑玻璃》時喊咗，因為突然諗起，呢首歌叫做今年個個都識，不過唔係我作㗎喎，出道時候話自己係唱作人，原來最叻嗰首歌都唔係自己作，就有少少覺得自己係咪咁差？之後一路唱，下一part就唱兩首自己寫詞嘅歌，唱下唱下啲歌詞，再望下個提詞機，係自己作曲填詞編曲嘅歌，原來又唔係真係咁好用，又喊，因為我性格都係將感受收埋，去到上台唱歌，一有情感投入，突然間就爆了！」
問Kaho對去年的紅館處男騷給自己多少分數？他坦言︰「我諗十分滿分得一分，我期望自己練完，可以擺得返上台俾大家睇，其實做唔做到呢？都有做到，但唔係十足，我覺得喺紅館做騷，其實我同好多人都傾過，同MC（張天賦）都傾過，其實大家第一次做紅館，不約而同都有一個諗法，唱唱下個騷做到一半想腰斬呀，我賠錢俾大家啦，我唔得喇，因為完全進入唔到一個做演唱會應有狀態，enjoy唔到，個感覺就好似讀書嗰陣時，捱過一堂冇興趣課堂，我諗紅館就係有一個咁特別嘅魔，好似一場好大考試，話晒人生其中一件大事，第一次做，難免會緊張點，你問我，我冇好大失手和失誤，我只覺得效果，唔係我自己最滿意，例如唱歌有好多地方可以好啲，一分可能誇咗啲，三、四分啦！」
好多人拎我同MC比較
Kaho說，慶幸請了張敬軒做嘉賓，對方的心得，令他第二晚可以應付自如，「可能自己都固執，網民又好，或者覺得我未夠資格嘅人又好，好想證明俾大家睇『我做到喇』，但又未做得晒囉，有少少遺憾！我問軒公，好幸運請咗佢做嘉賓，rehearsal時我問佢，點解我上到台好似咁喘氣？佢話佢啱啱第一次紅館都係咁，喘到爆，後來發現係咩事呢，就係上落台換衫，會跟住FM帶路，佢哋都好趕急，因為冇乜時間，但所有人跑緊嘅時候，原來你係要好平靜，第二場我就冇理過佢哋，真係好咗好多，得到呢個tips，去到邊都受用。」
今年開了個好頭，Kaho首plug新歌《閃光》包辦曲詞編，記錄了他如何與自我、外界目光搏鬥的歷程，當閃避成為習慣，怎樣重新發現自己的光，「其實有少少想講依家做歌手，或者藝人或者幕前嘅一些代價，種種代價，其實我絕對明白，但同時仲未完全適應到，惟有去改變自己心態，慢慢去接受，有少少好矛盾！坦白講，以前冇人識，就好想有人識你，如果街上有人認得我就威喇，但如果全街都認得你，你就想透明，所以係矛盾嘅！有冇咩特別經歷好唔開心？可能網民又好，現實生活又好，其實有一啲超越自己認為對私隱有條底線，生活上冇咁自在，少咗機會見朋友，少咗出街，對生活對世界感受少咗好多，呢啲都係頭先講嗰啲代價。」
Kaho差一點就不是用「洪嘉豪」這個名字出道，只因為唱片公司當時覺得名字太普通，洪嘉豪說：「其實……點講呢？你唔會覺得自己會係一個天王巨星，只係同每個人都一樣生活，但我仍然係堅信，每個人都係有自己機會，係囉，嘉豪呢個名就固之然普通，但慢慢學識心態轉變，好多人都叫嘉豪，但每個嘉豪都未必一樣，要慢慢學識欣賞自己優點。以前好多人拎我同MC比較，佢唱歌係有一個好獨特威力，但我作曲叻過佢、樂器又叻過佢喎，咁會唔會有人話MC唔夠Kaho叻吖？又唔會喎，啲人話佢靚仔過我，但我隻眼大過佢喎，哈哈！冇得咁樣去比較！我記得我正式入行喺公司簽約嗰日，公司話我個名好普通，叫我改名，我唔改，我希望有一日做到，大家一講『嘉豪』就諗起我，依家應該都做到！當時我話，希望五年內開到一個麥花臣（演唱會），咁五年幾開到紅館，都叫超額完成了！」
封面攝影：Andy Chan
攝影協力︰小白、Melody Ng
花絮攝影︰洪志富
形象︰Nana Wong
形象協力︰Haley Chau
化妝︰Circle Chong
髮型：Haysses Ip@PRIVATE I SALON
服飾︰Alexander McQueen、Chaumet、Damiani、Diesel、Gentle Monster、Giuseppe Zanotti、Isabel Marant、Kenzo、Longchamp、Mei Wo Leng