乳癌復發積極接受治療的吳文忻（Nathaliie），今年一月，在最新的CT Scan報告並不理想，細胞變異擴散至肝臟並發現3cm腫瘤，令阿Nat覺得與死亡十分接近。
樂觀的阿Nat，主動提議與一班閨密舉辦一場溫馨的「生前追思會」，完成後她便再度入院，準備接受新一輪治療。
阿Nat身在香港大學深圳醫院接受新一輪治療
在今年一月的CT Scan報告，阿Nat不想遇到的情況都發生了，「最近照咗CT Scan，去咗肝喇，肝嗰度好似3cm，個胸嗰度已經大到12cm，因為真係好大嚿、好纏繞，淋巴嗰啲我自己望到都幾大嚿，咁冇呀……一切都係繼續盡做啦！」
阿Nat透露，除夕當晚她需要入院輸血，「12月31號我都入咗院輸兩包血，因為啲標靶藥都會令到個紅血球、血紅素低，嗰日係低到醫生即刻叫我入院輸血，所以我New Year’s Eve喺醫院度過，但1月1號就出返嚟，輸返啲血，個人有返啲精神，依家就將標靶藥分量減咗少少，食緊第二個月，睇下點樣囉。」
上周四（5日），阿Nat前往深圳進行新一輪治療，這次入院預計一星期，阿Nat在電話中向本刊透露：「其實我依家上咗香港大學深圳醫院，我覺得依家on the right track，同埋身體都開始回復返，冇之前咁死！今個星期會做化療同試新藥，過多幾日就應該會返香港。」
她再解釋︰「我之前喺香港真係覺得好似得返四分一條人命，依家就逐漸有返啲精神，同埋我仍然好深信，有一日會好返，所以繼續努力，加油！」
談到早前與一班閨密舉辦的「生前追思會」，原來是阿Nat主動提議，她說：「係我提議嘅，主要原因係因為過去嗰兩、三個月，身體狀況覺得愈來愈差，差到個地步直情覺得，嘩，好似離死亡好近，所以我就同啲同學仔提出呢個建議，轉頭佢哋即刻幫我搞咗一個好開心嘅生前追思會。我不嬲都百無禁忌，其實搞追思會，人都走咗囉，都感受唔到人哋同佢哋講嘅嘢，我覺得能夠生前搞，去同一啲珍惜嘅人，去聽聽佢哋講咩呀，對你嘅感受呀，我覺得都幾好呀，而end up亦都變咗一個好開心嘅聚會，大家講返以前細個嘅嘢，同埋係一個加油站，大家都為我打氣，所以，我真係好多謝我啲同學仔。」
一向性格堅強的阿Nat，坦言因今次追思會令她有所啟發，「呢個聚會最感動同令我有啟發嘅係，原來有時自己要打開自己心扉，去接受被愛囉，因為我一向show出嚟都好堅強，唔想大家擔心，所以好多嘢都自己承受晒，但我發覺原來當自己打開心扉，去接受人哋嘅愛，係一件好感動、好開心嘅事 ，呢樣嘢係今次令我學識嘅！」
‧被訪者言論純屬個人意見，並不代表本刊立場
