做了父親，周柏豪仍然是「愛妻號」，以前談及太太，柏豪總會有所保護，如今，他已不介意告訴大家，他和太太這段相戀二十年的愛情故事。「我哋○六年一齊、一六年結婚，老實說，二十年至今都冇特別去保持新鮮感，因為從來冇過期，大家鍾意嘅嘢好相近，亦都好鍾意小朋友，冇大嗌交，就算有磨擦，當晚或瞓醒一覺就磨合。我性格主動，遇到問題就去解決；太太執行力好強，大家係一隊好team，有時佢帶領我、有時我帶領佢。」
快樂來自小朋友成長
柏豪和太太Stephanie，拍拖長達十年才結婚，當時為了保護感情，兩人從未被拍過在街上公開拖手，「以前佢做時裝buyer，要飛來飛去，我會飛過去搵佢！當年因為未公開status，要偷偷摸摸，去到要搵啲冇乜人嘅地方先拖手，依家諗返幾刺激、幾開心！有時俾啲驚喜，講大話仲拍緊嘢，就突然出現喺佢前面，有次佢生日，就夾好晒佢公司同事，突然上去，依家做唔到呢啲喇，因為要返嚟照顧小朋友，但依家有依家嘅快樂，好安穩，快樂來自小朋友成長。」
說到與太太最深刻的moment，柏豪就透露是求婚那天，「訂咗一間酒店，個景好靚，但前一晚狂風暴雨，我仲好記得自己當時心情，死啦，聽日求婚，想喺風和日麗靚景下，但十號風球都照求啦，一起身望到個天好清，馬上就求婚了！我哋離開酒店，門口有道彩虹喺頭頂打過，嘩，好感恩！前一晚落雨，跟住彩虹，覺得係好大禮物，用錢都買唔到，影晒相拍晒片，可以等老咗睇返！」
女兒遺傳了父親的運動細胞，而囝囝就充滿表演細胞，「個仔同我一樣係香蕉狂熱，我可以一日食五六七隻，阿女好鍾意運動，乜運動都鍾意，兩個興趣班多達十幾樣，籃球、溜冰、游水、攀石、畫畫、功夫、跳舞、扮忍者爬來爬去、體操，冇證書，純興趣，佢哋要求，如果一日冇學，會問點解唔搵啲嘢學？我唔係怪獸家長，會俾佢哋試完，再搵自己鍾意嘅嘢。」
唔係純粹唱完歌就算
就算在內地工作，柏豪都盡可能即日來回，北京、上海都可以搭最早機，中午工作，搭最尾飛機返深圳，深圳搭車返屋企，但在疫情期間，他曾在內地工作十個月，無法回港。「返嚟要隔離，再去內地又隔離，來回五十六日，做唔到，結果逗留工作差唔多一年，同仔女老婆失去好多時間，所以依家盡量陪伴，用最優質嘅陪伴，唔係揸車載佢哋出去就算，如果去到公園，你都係撳住電話，咁就失去意義，所以盡量spend多時間，為自己製造美好回憶，成日同佢哋講，影張相啦，佢哋唔影，我就出殺手鐧話『爸爸老咗可以睇返喎！』，佢哋就即刻擺pose，知道我想將個database愈來愈豐富。」
這十個月雖辛苦，但有收穫，為他內地事業打好基礎，「好感恩，得到好多機會，喺舞台、鏡頭前學咗好多以前接觸唔到嘢，以前市場單一，自己性格含蓄，做完就算，唔會諗點樣令多啲朋友認識我、認識我啲乜？依家市場接觸多啲人，甚至唔同語言，要話俾觀眾知我係邊個，將好嘅一面帶俾觀眾，要有雙向交流，呢樣嘢以前冇諗過，呢幾年不斷見唔同人、團隊，了解做藝人唔係純粹唱完歌就算，有好多前面、後面嘢，令歌手更立體，甚至呢個訪問，點樣令大家睇完更了解我，都係一個學問。」
在這個綻放之章，柏豪不僅是歌手，更是愛妻號和家庭守護者，他和全世界的父親一樣，邊學邊做，他說：「時代變得太快，但我會繼續學習和追趕。」
封面攝影協力：Ernest Cheng
花絮攝影：鍾漢平
形象︰Winnie Hu
化妝：Jenny Tziong
髮型：Pakman Chau
服飾：COS、Sandro、Shiatzy Chen、YMDH
