無綫真人騷《爸知弊！你嚟湊吖！》將於明日（31日）首播。首集登場嘉賓為林盛斌（Bob）、太太黃乙頤（Pearl）及細仔Jaye Jaye；Pearl認為Bob最需要改善的地方是脾氣，她說：「佢覺得男仔要有承擔啲，所以對個仔特別惡，連個仔本書擺得唔啱位，佢都可能會好忟憎。」
Bob要應付節目組安排的連串「不可能任務」，當中最讓Bob頭痕的，是要教曉Jaye Jaye「3的乘數表」，Bob一接戰書即忍不住拋出：「今次死火，有排搞！」結果一如所料，阿仔一聽到乘數表即瘋狂逃亡，Bob尚未從絕望中回魂便要用盡各種方法制服兼勸服阿仔，除了要箍到實防止進一步逃亡，又不斷在阿仔耳邊發功令他記熟算式，必要時還會化身「正能量大使」為阿仔加油及打氣，完全是體力及腦力大考驗，慘情程度令路過的「爸知弊幼稚園」校長黎諾懿亦忍不住笑住食花生。
Bob還要應製作組要求與太太上演「爭女大戰」，即時實測大女及二女會先回覆阿爸定阿媽message，結果Bob即使在第二round出茅招，亦未能扭轉劣勢、連續兩round被老婆KO，不甘心的Bob一度搶電話與二女講數，卻遭阿女爆出一句：「你講句真話吖！」與阿仔玩「估泥膠」遊戲時Bob再度老貓燒鬚，竟然搞錯阿仔意思以致痛失分數，並遭黎諾懿狠批泥膠「還原度」遠不及阿仔，由醒目司儀淪為豬隊友。連環失威的Bob，馬上向阿仔道歉，豈料換來阿仔「人細鬼大」安慰：「唔緊要啦，你都係我爸爸！」隨即笑爆全場。
其實Jaye Jaye確是盡得Bob真傳，一出場即大顯非凡身手的他，全程表情多多兼相當討喜，轉數及求生意欲更是超乎想像！話說兩位校長突然拋出千古難題：「你鍾意爸爸多啲定媽媽多啲」，Jaye Jaye聽完先秒速投向媽媽懷抱，但當發現爸爸勁失落後，即扮迷茫企圖蒙混過去：「你（爸爸）會俾我多啲時間睇電視，媽咪又成日都攬我，我揀唔到呀！」
