陳豪與太太陳茵媺今日以夫妻檔出席汽車活動，成為第20,000位車主，陳豪表示自己成日要開工，所以太太經常做司機接載小朋友，問到係咪娶到個多功能老婆，他說：「娶到位好老婆，佢揸車多過我，佢好享受揸車，因為我成日要開工，屋企嘢全部都交俾太太，而且屋企加埋3位小朋友，每次出街都成隊兵，車嘅要求最重要空間要大，坐要舒服豪華，低調不失格調。」Amiee表示自己於外國生活時已揸車，向來十分享受揸車樂趣，「對於媽咪嚟講架車好重要，小朋友返學同去玩都係親子時間，因為小朋友玩冰棍球，所以車尾要擺好多嘢。」
陳豪今年於《萬千星輝頒獎典禮 2025》再度晉身視帝十強，由於今年台慶時，一班藝人在台上獻唱時炒晒車，唯獨他沒有唱歌甩難，問到他會否有機會再獻唱，他即不忘拉票，「十強每位都好強，但如果當晚俾個視帝我就即唱俾你聽，隨便點唱，其實平時我都有唱俾小朋友有聽，加上囡囡都喜歡唱歌，我曾經作為歌手，都有指導下小朋友，知道咩音係正確，咩音準係唔啱，不過佢都係玩下。」
