中年好聲音4｜唯一5燈藝人引網民熱估　 「獅子王」真身羅天宇冇難度

《中年好聲音4 決戰TVB藝人賽區》昨晚（14日）一集播出後，在網絡引發熱討，當中最大焦點，落在「靚聲企鵝人」及「高辨識度獅子王」身上。先說「企鵝人」，以超強唱功演唱《Touch》的他，成為本集唯一獲得5燈藝人，並獲評審們大讚，肥媽：「有料！一開聲我就話佢有料」；海兒：「喺咁高壓嘅情況下，都咁游刃有餘咁唱到呢隻歌，Congratulations！」周國豐：「參加咗四季，我未試過咁樣形容一個參賽者，我會用拉筋嚟形容，因為你條筋好鬆，即係聲帶，令到成件事好舒服，好似海浪咁一陣一陣。」張佳添則指「企鵝人」撞聲原唱古巨基：「其實你係咪古巨基嚟？睇吓隻手有冇汗，聽到你有靚聲有感情，有技巧，有細緻。」車婉婉亦即時配合舉起「企鵝人」的手認證「好乾爽」，笑爆全場。

由於「企鵝人」唱得實在太好聽，加上單憑聲線相當難估出真身，隨即引發網民洗版式「熱估」，綜合各大留言，三大嫌疑人分別為張振朗、鄭俊弘及周志康，更有不少網民翻摷三位以往公開演唱的片段作對比搵答案，相當認真！同樣在網絡引發熱討的「獅子王」，則由於聲線太有辨識度，網上幾乎逾九成留言都熱估是羅天宇。

今集共有兩名藝員選手被淘汰，分別是演唱《為何他會離開你》的「熊貓寶寶」葉凱茵Fanny，及跳唱《烈焰紅唇》的「馬騮精」阮兒。獲不少圈中人認證唱功的葉凱茵，因臨場過度緊張影響發揮，最終僅獲1燈被淘汰，並按大會規定摘下面具，當時Fanny已哭成淚人。有「御用秘書王」之稱的Fanny，入行雖已長達23年，但坦言上《中4》緊張過拍戲：「真係好緊張，發揮唔到平時自己嘅水平，冇諗過自己得一盞燈。」肥媽亦撐Fanny：「我同佢都同台過，佢喺台度揮灑自如，唱歌又好，又有樣，好難相信（今日）呢個係你。」Fanny事後不忘感激老公大力支持：「我其實有猶豫過不如唔好嚟，安分守己，安分守己本身就係我性格嚟，但佢（老公）話：『唔好啦，我對你好有信心！』佢係（俾我）120分嘅信心，比我自己更多。」

至於同樣被淘汰的阮兒，則感性指自己日後一定會更進步：「好開心有機會參加《中年好聲音4》，其實我想講上呢個台唔簡單㗎，有一段時間我希望做到一個跳唱歌手，奈何都冇呢個機會。但我今日可以喺5位咁好嘅評判口中得到咁好嘅建議，我一定會記得，我一定會進步，希望大家記住我！」