黃翠如雖然在今次巴黎奧運被彈是「最廢特派員」，但完成工作回港的她，除了出席《快樂聯盟》飯局外，之前到內地拍劇的老公蕭正楠亦已回家，並恢復他在家的大廚角色，醫飽老婆翠如的肚。
老蕭昨夜（14日）先在社交網分享翠如開心吃着他炮製的粉絲蝦煲，留言：「終於回家，馬上親自下廚，極秀粉絲蝦煲，獎勵獎勵，聽到一句，好食過法國嘅中餐，我應唔應該開心呢，不過好快見到佢清盤。」清完盤的翠如更在帖文留言區落Order：「唔該，聽日要沙嗲肥牛粉絲煲」！
今午翠如就曬出老蕭聽從她Order的勝利照，不過今次她沒上鏡，由老蕭夾着粉絲，最後一張都是清盤照。翠如留言：「蕭家廚房，沙茶牛肉粉絲煲，看得出，最近我家的粉絲存量有點高，也看得出，我家大廚最近廚藝有點高，多謝米飯班主」，老蕭亦疑似預告：「唔知下餐係咪食節瓜蝦米粉絲煲？」有網民留言：「我都係你兩個的粉絲」。
