闊別香港舞台七年，周柏豪終於兌現與歌迷的約定，昨晚（14日）白色情人節於啟德體藝館舉行《周柏豪 THE BLOOMING CHAPTER》音樂見面會。這場被柏豪形容為「由香港出發，返屋企嘅第一站」的演出全場座無虛席，以歌聲笑聲為七年之約揭開完美序幕。除了獲太太與一對仔女撐場外，好友連詩雅、陳家樂、193（郭嘉駿）、鄭融、布志綸等亦到場支持，見證這個「綻放」時刻。
柏豪將體藝館化身巨型遊樂場，獻唱近三十首歌曲，從經典作到新歌均觸動歌迷無限回憶，全場由頭唱到尾，更站起來跳舞，場面墟冚。除了唱歌，他更與歌迷大玩「估歌仔」和「唱K」，互動溫馨熱鬧。
全晚高潮之一是好友鄭融驚喜現身。原本低調坐於觀眾席的鄭融，被柏豪一眼認出並邀合唱，她二話不說脫去口罩站起來，以最真摯樣貌面對觀眾，更搞笑自爆：「我箍緊牙㗎！」柏豪即笑說：「箍牙你都唱贏好多人啦！你絕對係同我一齊成長嘅朋友，由《一事無成》開始，我哋去過好多商場、做過好多event，真係好多回憶‥‥‥」鄭融聽後亦感觸良多：「你記唔記得，我哋兩個坐喺TVB錄影廠等埋位，你攞咗個MP3出嚟‥‥‥真係好想攬下你！」兩人隨即即興合唱經典合唱歌《一事無成》，引發全場「回憶殺」，歡呼聲響遍場館。
唱到《同行》時，柏豪幾度深呼吸強忍感動淚水，哽咽向觀眾表白：「好多同事估我今晚幾時喊，我真係好多謝大家咁支持我。我話咗唔喊，今晚點都要忍住！」這份對舞台的珍視與對歌迷的感激，令全場動容。
柏豪在演出後特別感謝家人的無私支持，透露開騷前兩星期，家中經歷一場「小風暴」：「仔女病、老婆病，老婆當機立斷趕我出家門，叫我即刻租酒店搬走，免得我染病影響演出。」他坦言當時「離家」非常不捨：「作為爸爸，要因為工作丟低家人，真係好唔好受。」幸好最終順利完成演出，沒有辜負家人的犧牲。
提起一對寶貝仔女，柏豪即父愛泛濫，透露囡囡對自己的愛是「一千分」。他搞笑說：「排練時仔女都有嚟睇，玩唱K環節冇人舉手，我個女竟然舉手話佢可以唱，於是就同我合唱咗幾句《一事無成》！」他更笑指囡囡對他的痴纏程度，有時連太太也覺得「過份」。問到囡囡鍾意BLACKPINK還是爸爸多一點？柏豪自信滿滿：「梗係鍾意我多啲啦！佢對我嘅愛係一千分㗎！所以我有時會諗，第日佢大個唔再咁愛我，我唔知接唔接受到。我依家可以講定，第日佢男朋友要聽住：『我個女係公主，佢真係要對佢公主咁先得㗎！』」公然向未來女婿宣示主權，引得全場大笑。
Encore環節唱新歌《純粹想哭》時，螢光幕出現實力派演員黃文標的身影。柏豪事後透露，知道標哥最近健康欠佳，初步評估患有柏金遜症：「拍攝時對方非常專業，雖然察覺到佢身體有啲唔舒服，但完全冇影響工作。我非常感謝標哥參演MV，知道好多朋友都因為佢嘅演出特別去睇我呢個MV。」
是次見面會製作認真，無論歌曲編排、與樂隊大玩Rock的狂野，還是自彈自唱的深情，均展現超越一般見面會的水準。柏豪全晚換了五個造型，當他以背心造型登場展現結實臂彎時，全場女歌迷即高呼「除衫！」他抵死笑言：「嘩！台下突然見到好多個女同學、家長朋友，平日佢哋見我唔係咁㗎，係咪覺得我變咗第二個人？哈哈。我平日係七人車司機，成日車同學仔放學，好正經㗎！今日佢哋可能覺得：『點解個司機哥哥變咗咁古怪？』都係唔好除啦‥‥‥」
香港站之後，柏豪將展開新一輪巡迴。問到何時再舉行真正的個人演唱會，他坦言當然希望再返紅館，明年是他入行二十周年，但能否取得檔期、世界會否有其他變化，並非他能預計：「我只會每日努力朝著呢個目標進發，希望明年可以喺香港同歌迷一齊慶祝二十周年。」
