兩部車緊貼到達山旮旯大屋之後，半邊天有雨後彩虹，另半邊黑過墨斗，剛才師弟在車廂猛講本地降頭古仔，信則有，不信則無，突然見到屋頂有黑影一現即刻消失，家姊走過來抱起ＢＢ：「佢頭仔仲有啲㷫……阿Pamela，天台上面嗰個係咪你啲body guard呀？」
「冇呃，今日得兩個，佢哋話去左樹林仔度等我哋，嗰度搜過冇偷聽器……ＢＢ做乜瞪大對眼呀，做乜嘢呀？」我跟瑪莉亞跟在後面，見ＢＢ眼鯨鯨望住我倆，「做乜睇住我哋呀？」ＢＢ像看到我們身後面有人整古做怪，我哧一聲就回頭舉高手指槍，卻四野無人再落後，「撞鬼咩，嚇死我啦！」累瑪莉亞抓緊我的手臂。家姊停下來在數人頭：「人齊，我哋去咗樹林仔先，我有新想法……Pamela，頭先我落車，你最信得過嘅天奴，話我知，喺機場見到你Daddy個老婆，返咗嚟吉隆坡。」登時各有各不同反應。「跟我嚟，啱晒，大家醜婦都終需見家翁。」
家姊罕有逐一用一句吩咐大家謹記的指示，保鑣已得知那位後底乸夫人直接先來大屋。家姊勒令各人散去，若無其事。彭美拉第一個接到電話，吸一口氣，輕鬆出大門口，親吻又緊捉來人入屋。眾人故意散收收路過客廳，廢話照講，家姊跟這個花名「等天收」的婆娘鬥慈祥，這時才察覺後底乸兩隻眼珠望着不同方向，我不禁忍笑而放了個屁。「阿Mary姐，乜嘢聲呀？吓？」
「本來唔好咁快講啲咁嘅嘢，皆因你個女好乖，叫我哋入嚟呢度攤唞開心吓，點知成日都唔知點解……成日都有啲聲，聽到好唔聚財……」
「家姊，今日怕係我猛食咗啲番薯包，失禮晒……」
「點會唧，個個入親嚟都聽到過……咁靚間屋，嘥晒……阿ＢＢ瞓醒嗱？過嚟叫阿Auntie婆婆喇……」ＢＢ甚少披頭散髮，目露凶光，一手撥開家姊，走過去攬住彭美拉雙腿，「姐姐……嗚嗚……姐姐。」發出的是老牛聲，彭立即崩潰半跪攬着飲泣，那位「等天收」也慌張得兩隻眼珠冇左冇右的轉動，「陰功點解咁㗎？」這時瑪莉亞拿着奶樽衝入來掩嘴尖叫，ＢＢ繼續猛吐口水，「我好痛呀，好痛呀……」再突然驅魔人經典場面般，怒目向「等天收」，再流更大督口水，師弟與孝活衝入來：「唔好意思，我哋等解籤，遲咗返嚟，佢哋話……」孝活搶過師弟手中黃色的紙張揚向ＢＢ，瑪莉亞尖叫撲去：「你哋唔好咁對我ＢＢ，關佢乜嘢事唧……」ＢＢ亦立即合眼放軟手腳，任由被抱走離開，彭美拉也索性哭訴：「媽咪，我哋翻新過呢度咁耐，都冇聽過，有人見到阿細佬冇扯到，一路都仲喺度唔捨得扯……」
「係呀，解籤嗰個話，係隻歲零大嘅男仔嚟㗎。」
「你哋唔好亂講嘢喇，阿阿……阿天秋妺，你嚟得唔啱時候……」
「我哋個ＢＢ又係得嗰歲零，咁冇陰功，佢係男仔又點會上女仔身㗎……」
「阿PK你講少句喇。」
「但阿爸佢都要知點解會咁寃魂不息嘛！」
「Howard！一言難盡，我……我唔敢累你哋一家人，我哋都係唔好結婚住，媽咪，我哋返去喇……」
「吓？好喇，就天黑啦，Mary 姐你哋個個小心啲呀……」
「度符使唔使跟埋佢哋上車呀……」
「係就最好喇，俾番個ＢＢ我哋呀。」
「PK大家都唔想嘅，咪咁牛精喇，Pamela唔好喊喇，唔送啦。」這個「等天收」雙眼已變成鬥雞，家姊大功告成。
這場家姊口述的戲，個個掌握應有的節奏，ＢＢ最拿捏得爐火純青，皆因在青山的日子，她與敲鑊叔叔，飯後合演的折子戲，一向令人歎為觀止。