無綫熱播戀愛綜藝真人騷《女神配對計劃》明晚（17日）一集，將是Dating Camp最終回，葉蒨文（Sophie）與曾展望（GM）（2人組合簡稱GS）的真情對話。GM難得一見地不再玩玩吓、改為認真Tone向女神真情剖白；雖然觸發點只是「幫Sophie搵電話」，但自覺被誤解的GM剖白時，仍數度委屈至哽咽兼落淚。這集觀眾除可看到GM坦誠及純粹一面，亦會更明白這個大男孩內心的脆弱。
在單對單真情對話環節，GM主動找上Sophie為自己辯解，「我唔想令你覺得我懶懶閒，唔在乎，我唔係咯」、「其實其他人誤解我唔係好著緊，我淨係緊張你有冇誤解我」、「係咪每次我一笑，跟住就（代表）咩都冇做咁哩…」當GM提到被誤解找電話不夠落力時，深感委屈的他一再哽咽、數度難過至說不出話，去到最後更流下男兒淚。GM出乎意料的脆弱令Sophie方寸大亂，一再出招安慰及氹GM之餘，自己亦忍不住被感染落淚，充份展現了她對GM的共情。
雖然委屈又難過，但GM最後不忘向Sophie大派定心丸：「我淨係想同你講我好緊張你。」當得到Sophie肯定時，眼眶仍帶著淚光的GM馬上破涕為笑，並纏着Sophie冧豬地說自己想主動message聯絡她。Sophie接受製作組訪問時稱全盤接收了GM的真心、真摯及真誠，這是她喜歡GM的其中一個原因。Sophie因被GM觸動，之後與Eddie真情對話時仍藏不住眼淚。她說︰「好多人都問我係咪有劇本，我從來答人都係『起碼我好真』。啱啱我覺得係原來好多人都好真，我覺得好特別呢個體驗，我覺得會好多年之後都會好難忘。」
