許廷鏗（Alfred）近日可謂禍不單行，繼早前打匹克球（pickleball）時不慎受傷導致足底跟腱撕裂後，日前更因心急返回牙科診所照顧病人，在樓梯踏錯步跣落10級樓梯，導致左手手肘受傷，今天（14日）需要入院接受手術治療。儘管接連受傷，Alfred在手術前夕依然如常開工，為周年晚宴擔任演出嘉賓，更以一身斗篷造型遮掩需佩戴托手帶的左手，敬業精神令人敬佩。
Alfred日前欣賞林宥嘉及柳應廷演唱會時，已自爆打波受傷令步履蹣跚。未料傷勢尚未復原，他又因意外跌傷手部，需要入院做手術。在手術前夕，他因接下商演活動，為免影響觀眾情緒，特意在演出時以斗篷巧妙遮蓋受傷的左手，期間更勉強伸出左手跟台下觀眾握手，盡力完成演出。他在晚宴上獻唱一曲《無力感》，更自嘲以目前這個狀態演唱這首歌曲特別應景。
Alfred今天在社交平台的限時動態分享演出時的影片，並以文字及與網民「快問快答」方式交代出事原因及目前的狀況。他在影片中表示：「今晚去咗唱歌仔，有冇覺得同平時有咩分別？其實呢個斗篷造型係內有乾坤。話說上排我打Pickleball整親腳嘅，足底跟腱撕裂，都未update大家，又有新嘢出現，驚喜真係一浪接一浪。」他其後揭開斗篷，驚見左手要用固定帶吊住，他坦言：「呢條帶並唔係造型一部分，答案揭曉！冇錯，我連手都整親！」
Alfred透露其實今晚就要做手術，今日亦思考了很久如何呈現演出：「與其喺屋企懷疑人生，我寧願做啲我鍾意嘅事，分享一吓正能量，亦接收吓大家嘅energy，仲有好窩心嘅『集氣』，我相信聽日手術一定會好順利﹗正所謂『別忘掉原是靠堅持醫好每個傷患』，大家等我滿血復活﹗」
談及受傷經過，Alfred詳細交代了事件始末：「講起都覺得有啲後悔，原本就係因為打PICKLEBALL，個新球場地下有啲黐腳，熱身唔係最足夠落場，一下箭步想往前追波。『撻』一聲仲以為對鞋爛咗，原來係自己隻腳條足底筋，已經即刻坐低。不過後悔都來不及⋯⋯足底筋撕裂之後，睇咗骨科醫生，雖然隻腳唔需要做手術，但係都建議用一個保護嘅助行工具AIRCAST，喺隻腳唔係最好嘅狀態，心急返牙科診所睇病人，喺樓梯踏錯步，跣咗落10級樓梯，落地時候左手自然動作往前伸，就聽到手踭又啪一聲。」
由於今次進行的是手部手術，不少粉絲擔心會否影響他日後繼續牙醫工作。Alfred安撫大家表示：「我相信醫生安排，佢都清楚我工作需要，希望可以盡快重出江湖。這兩天需要取消的病人，小弟對不起大家，會盡快重返崗位！」他更上載自己在台上表演《無力感》的歌曲片段勉勵自己，展現積極面對傷患的態度。對於手術前夕難以入睡，Alfred坦言心情忐忑，但依然相信醫生的專業判斷。他原定於3月21日出席《Cantopop321慈善演唱會》，據他透露當日將會如常出席，並希望手術後不會影響日後的工作安排。
