193郭嘉駿推出今年第二首新歌《I Just Wanna Dance》，眾所周知，ERROR四子當中，他是最不擅長跳舞的一位，有份填詞的193說，正正是他的心聲。
入行踏入第七年，每次193面對所有輿論和爭議，他都選擇正面衝擊，與網民互片！去年在土瓜灣駕駛法拉利撞倒婦人事件，是193唯一一次認錯，他坦言上了寶貴的一課，更因為這次意外，他再多考一個車牌，比道歉更實用。
新歌《I Just Wanna Dance》其實並不是跳舞快歌，算是193自己諷刺自己，「都算自己嘅心聲，入行到第七年，我都係比較抗拒跳舞，不過工作上我當然會配合，例如ERROR做show我當然會跳，但如果自己私底下，或者自己嘅歌，就唔係好想跳舞，有時啲嘢迫唔嚟！做咗咁多年人、入咗行咁多年，都知道自己鍾意乜、唔鍾意乜！點解有呢首歌呢？其實本身係上年造俾ERROR，但後來覺得《野舞士》比較適合四個人唱，所以大家都一致揀咗《野舞士》做演唱會主題曲，咁我就留返首歌俾自己；同埋今年第一首solo歌係我自己填詞《Keep Walking》，第二首歌想出啲抒情歌，但我發現根本冇人想聽193嘅內心感受，主題係乜都冇所謂，大家只係想聽返嗰啲《睡到三點》同《再次Puppy Love》。」
其實193亦有為跳舞下過苦功，不過，他又不想迫自己去做一些自己沒有興趣的事，「由細到大，我都係做啲自己有興趣嘅嘢，嗰啲我唔鍾意，我就唔會迫自己做，我知道有啲人鍾意挑戰自己，一定要做到，證明俾自己睇我得嘅，但我就唔係呢類人，我純粹鍾意嗰樣嘢，我先會努力去做，如果唔鍾意，我證明俾自己睇有咩用？我寧願自己舒服啲，開心啲好過啦！」
入行以來最嚴重的事
新歌MV有一場「社畜」險遭法拉利撞倒的一幕，是193的自嘲（曾駕駛紅色法拉利倒車撞跌途人），這件事是193入行七年來，算是最嚴重的錯失，他坦言上了寶貴的一課，「所有程序上，無論法律程序所有嘢，都已經處理完，咁咪自嘲一下自己做錯嘅嘢，拍嗰陣我仲問導演，咦，點解唔拍架車退後？跟住導演就話，全世界架車都係向前行，得你架車係向後行，OK！make sense！我個人好有原則，如果我覺得自己冇錯就冇錯，但係呢件事，我覺得自己一定錯晒，疏忽魯莽，令到呢個意外發生，亦都算係我入行咁耐最嚴重嘅事！」
錯了，都有得著的，「呢件事上面，我學到有事發生，首先要同人講，就算咩事都好，同公司講又好、或者同朋友講又好，起碼其他人會同你一齊諗同分析。當時冇諗咁多，因為都好驚慌，唔知點做，然後就好快俾人報道咗！為咗呢件事，之後去咗進修補鐘，亦都順便考多個牌，已經pass咗添，我補鐘嗰陣，個師傅都知我出咗事啦，佢都話我，你真係要望鏡呀！好基本，無論向前向後行都好，你望鏡望中間望左右先開車，有時就係望得唔夠多。」
鏡頭前的193，喜歡講笑又玩得，但他坦言自我保護意識很高，在圈內亦沒有很多朋友，「圈內朋友真係比較少，做到好好朋友都唔係圈內，我自我保護意識好高，好多時我都唔回人message，或者會閒聊幾句，但一深入啲，我就唔係好想回，甚少交換電話，莫講話約出嚟食飯，我係一個比較自我保護嘅人，所以我最熟嘅朋友，其實係中學嘅朋友，加加埋埋都有廿幾三十個，都真係好熟，當然仲有ERROR三個兄弟，算係出生入死，咩交都鬧過！」
同時因《造星》出道，MIRROR走的是主流偶像路線，而ERROR走偏鋒另類，他們之間的感情，很多時都會被傳媒放大和比較。早前姜濤墜海，問到193有沒有馬上聯絡姜濤？他說︰「嗰日夜晚就搵咗佢㗎啦，我知道佢性格，搵佢係會過兩、三日先覆㗎，但喺IG搵佢呢，佢就有機會覆，所以我就喺IG搵咗佢，我都冇講啲咩，只係講咗句take care，有時間休息多啲，我睇好多報道，個個都話佢冇覆過，咁我算有覆嘅，因為佢俾咗個心心我，其他人連心心都冇㗎嘛，哈哈！純粹想俾個安慰佢，話俾佢知仲有人關心緊你呀，其實嗰晚我出咗街食飯，隔離枱喺度講緊，呢件事上面，我反而見到嗰啲人嘅口沒遮攔，喺度笑人哋囉，我覺得好黑心，我最大反感，係佢哋討論呢件事用嘲笑方式討論，我係好嬲！」
姜濤壓力一定好大
193坦言，姜濤的壓力一定不少，出道時仍然很年輕，未必有抗壓能力，「一定壓力好大嘅，比起我哋，因為我都叫做工作多年，我廿七、八歲先入行，已經有啲處世經歷，喺大學又對咗咁多人際關係，再加上佢嘅討論度大過我好多，所以一定係有壓力，我諗全香港最大壓力嗰幾個，一定有佢份㗎喇，如果俾我就攞啲錢掟死嘈我鬧我嗰啲人，咁多錢！」
早前姜濤自爆只剩三年約，隊長Lokman亦默認MIRROR成員同期約滿，問到193的合約問題，他直說︰「MIRROR就個別成員，例如Ian都在訪問講過，佢嘅約係長啲，所以我唔肯定係咪每個人份約都一樣，但我承認同阿姜、Edan講嘅係同一份約，應該係，人工就應該唔係，暫時未傾，都仲有成三年，見步行步囉，冇乜plan！我完全冇乜諗法，我連出歌都冇plan，無啦啦出首快歌，都係上個月先諗就即刻出，冇乜plan但係咩都想做，又想拍戲，我知自己有興趣做演員，所以keep住學戲。呢間公司容納到我嘅好處，因為佢有綜藝節目，可以出歌、又可以拍劇，所以，嘩！如果真係轉公司，咁就冇綜藝俾我拍喎，所以其實呢啲都好多考量，但係有時又想，可唔可以專注拍下戲呀？我諗都係去到臨尾嗰兩年，或者一年先會開始傾，公司暫時未搵我傾，我都問過其他人都未搵，到時再算！今日唔知聽日事，邊個知？依家經濟咁差，呢間公司，我講緊ViuTV、PCCW一定唔會執，咁賺錢，呢個電視台起碼有個靠山囉！」
經濟差環環相扣，幕前幕後亦大受影響，冇戲開冇劇開，193又拋出金句︰「邊個堅持到就勝利！」他續說︰「經濟差當然對生意有影響，對所有嘢都有影響，藝人都有影響，廣告商都會少咗budget，以前可能係一百萬個廣告，依家有九十萬都好好啦，自己其他生意點都有少少影響，但好彩就係我哋做嘅生意，比較多熟客，我間居酒屋就係熟客為主，真係冇咗walk-in客，cafe都少咗好多，但慶幸都未使執，我見好多大集團都執晒，所以依家都係，邊個堅持到就勝利！」
髮型︰Man Chan@CHIC PRIVATE i salon
化妝︰Giann Cheung@Annie G. Chan Makeup Centre
形象︰Lok Fong@X.Glow、Eva Yu