「獅子王」演唱《天黑黑》
《中年好聲音4》本周日（2月1日）晚播出的第十集，70強選手繼續透過「一對一PK賽」爭奪40個晉級名額。今集將有2名藝人代表「獅子王」與「白眉鷹王」登場，其中一位更會榮獲5燈。聲音辨識度極高的「獅子王」女歌男唱《天黑黑》，由於演繹真摯，令「手緊王2.0」谷婭溦亦大為感動：「我自己有毛管戙，技巧過咗關，Feeling都有。」「獅子王」事後透露想將《天黑黑》獻給太婆：「佢（以前）會成日關心我，攞住罐餅去我間房問我：『肚唔肚餓啊？食唔食飯啊？』」、「呢啲溫暖有嘅時候唔識珍惜，到佢無咗嘅時候會好後悔。」
「白眉鷹王」演唱《假使有日能忘記》
「白眉鷹王」演唱《假使有日能忘記》，憑藉磁性聲音及躍進不少的表現獲評審大讚，張佳添：「你揀咗隻適合你嘅聲線、性格嘅歌，雖然睇唔到你個樣，但透過首歌認識你多咗。」谷婭溦：「高低起伏全部做到晒，一個好嘅Performance，你唱番你擅長嘅嘢，信心多咗好多。」周國豐：「我今日聽到音色好靚嘅你，呢首歌好啱，發揮到你嘅中低音。」
席間，評審們提及藝人參賽者要到被淘汰一刻才能除面具示人，肥媽對此大為感觸，並力撐參賽藝人精神可嘉：「好多人話藝人參加梗係想Promote自己，Promote咩？睇嚟睇去都係個獅子頭，佢哋為咗鍾意唱歌而去參加呢個比賽，值得俾啲掌聲！」
