阿Nat吳文忻（Nathaliie）去年8月於《明周》公開乳癌復發第三期，並擴散至淋巴腺，在這一年的養病期間，阿Nat積極面對治療。今年6月阿Nat再次接受《明周》專訪，坦言與丈夫陳劍陵已決定分開，結束14年婚姻的狀況。
前陣子阿Nat忙於搬新屋，加上兩個愛女放暑假，令她忙到一頭煙，但隨着小朋友開學，新屋亦已經整理妥當，新居附近有個大草地，讓阿Nat可以堅持每朝練氣，而PET Scan最新報告亦有好轉，炎症指數有減低跡象。
乳癌復發惡化至第四期，阿Nat癌細胞變異去到尾龍骨，她仍然持續更新抗癌日誌，今年2月在瑪麗醫院做抽針的化驗結果，最近她用同一細胞委託私家醫院化驗，報告卻不同，私家醫生驗出她是三陰乳癌，但瑪麗醫院兩次檢驗也認為不是三陰乳癌，故用藥不是針對三陰乳癌，這情况令她感無奈。
阿Nat接受訪問時補充說︰「之前喺瑪麗嗰個抽針報告，同我喺私家醫院做測試結果唔同，可能依家PET Scan出咗，會再睇返多一、兩個oncologist（腫瘤學家），睇下之後應該用啲咩藥，但我覺得就算用咩藥都好，點都要睇住自己個免疫系統，要提升返成個身體嘅『精氣神』，千祈唔好俾自己身體『冧』，呢個我覺得係最緊要嘅！」
而PET Scan最新報告顯示有好轉，「最近照PET Scan，見到好多炎症指數decrease（減少），有啲更加直接resolve（消失）咗，但係呢，主要左胸最大嗰個癌細胞呢，都仲係咁大，仲大咗少少添，但係發炎指數都係低過之前，所有嘢都係decrease嘅，其實呢個報告都係一個好消息！」
前陣子阿Nat忙於搬屋，加上兩個囡囡放暑假，她直言自己不能應付太大勞動和壓力，但已經開始學識與癌細胞相處，她說︰「開始了解佢嘅『脾性』啦，原來佢嘅『脾性』直接同我有關㗎喎，例如三個月前，由小朋友開始考試開始，跟住要搬屋、要搵地方，舊屋嘅嘢要清，新屋嘅嘢又要添置，跟住又要執屋，小朋友暑假又好多嘢要學，又要做司機、又要安排好多嘢，所以我發覺嗰段時間，以為習以為常嘅日常生活，原來不知不覺間都令到我會有stress，不知不覺地令到癌細胞都轉差咗，所以我發覺點解之前佢又開始發炎，又大返又硬返又紅又黑又熱！」
Nat續說：「由於真係太忙，所以好多輔助治療我都停咗，譬如打高濃度維他命C、好多輔助治療嘅嘢，連我平時練功練氣或者去做gym游水，全部都停晒，但隨住新屋搞掂好，小朋友9月1開學，我都開始輕鬆返啲！依家每朝送個女落去搭校車嘅時候，七點鐘就會去馬場做grounding（接地治療、身心治療的一種），接地氣、做氣功，話時話又真係好有效，我發覺隨住get back返去我呢個routine嘅治療方案，嗰個發炎即刻降低返！搬咗屋之後，我就決定每朝勤力啲，因為我好深信自己嘅身體係會有治癒能力，亦幫到成個治療事半功倍嘅，所以我會繼續持之以恆，呢樣嘢係最難，但係冇辦法啦，真係要做啦！」阿Nat現時每晚亦要吸住高能量氫氣機睡覺，去除體內的自由基，繼續加油阿Nat！
‧被訪者言論純屬個人意見，並不代表本刊立場