現年41歲的何遠東（阿東），2008年在香港演藝學院畢業後獲邀加入無綫，入行16年，曾演過不少「入屋」角色更有「綠葉王」之稱，其中劇集《降魔的》中飾演的士司機最為人認識。
去年何遠東在本刊透露離巢消息，外闖近一年，原來除了向舞台劇發展外，他亦從事教育工作，帶領兒童舞台劇表演和製作，希望除了幕前發展，阿東亦希望一嘗執導的崗位。
何遠東當年在香港演藝學院「優勝學生戲劇進修課程」中，獲得優良成績的證書，現在由學生變成導師，他希望薪火相傳，努力維繫着戲劇與新一代。
踏入馬年，阿東為本刊讀者寫了「福」和「馬上有」的揮春，希望大家「馬年馬上好運」和「馬上有飯開」！問他離開無綫近一年的近況？他說︰「離開熒光幕差唔多一年時間，雖然可能透過電視少咗同觀眾見面，但我仲有做表演藝術，依家主力就係教育方面，其實依家市道大家都明，可能演出幕前工作機會相對較少，所以我都想俾新一批觀眾認識我，一方面實踐自己教育理想，就係去教學生表演藝術，等佢哋享受當中過程同樂趣，變得更有自信；另一方面，其實我都想俾新一代觀眾，認識到『何遠東』呢一個演員，知道佢除咗演戲之外，佢都可以教書嘅！」
阿東同時繼續在舞台劇發展，過下戲癮，「舞台劇固然可以過下戲癮，依家我會開始寫多啲劇本同埋做導演，始終自己呢個年齡有啲尷尬，幕前工作唔大唔細，年紀大啲就話可以做啲叔父角色啫，啱啱夾喺中間，又做唔到細路仔喎，係咪？所以喺舞台劇就有多啲機會，參與演出同時，亦開始想做導演工作，依家都好充實。」
問到阿東的新年願望？他就說希望可以繼續四圍旅行，開闊自己眼界，「依家籌劃緊一年一度歐洲旅行，其實之前都連續兩年去過瑞士，完咗自己心願之餘，亦都帶咗阿媽去玩！上年就去埋東歐，希望過埋年，努力多幾個月之後，又儲夠水腳，我就可以去埋歐洲其他地方，希望可以見識多啲個世界！」
何遠東入行16年，曾演過不少經典角色。
黃智雯早前出演舞台劇《天下無不西之閨蜜》，《降魔的》演員馬國明、胡鴻鈞與何遠東拉隊捧場。