吳文忻（Natalie）抗癌3年，病情起起伏伏，今年更變「四仔」第四期，但她從未放棄，更以51歲之齡勇敢實現歌唱夢想，推出首支個人歌曲《重生》，亦成功入圍「新城勁爆女新人」，本周二（23日）在《藝人之家40周年演唱會》首先以歌手身份踏上舞台。
已故影壇巨匠喬宏創辦的基督團體「藝人之家」，今年創辦40周年，本周二（23日）在西九竹翠公園舉行福音演唱會，94歲的喬宏妻子小金子由西雅圖返港支持，而當晚吳文忻終於以歌手身份，第一次上台獻唱新歌，在台上更獲小金子領禱祝福。
阿Nat說︰「今次係第一次上台獻唱《重生》，當然非常之開心啦，因為自己一直夢想以歌手身份企喺舞台唱歌，終於做到喇！我一直覺得，雖然抗癌時期真係一啲都唔容易，但我覺得上天都派咗好多天使嚟幫助我，更幫我去成就咗呢件事，如果唔係，得我一個根本冇可能做到！當日錄完首歌，我就心諗，可唔可以有一個舞台，俾呢首歌真真正正『出世』呢？跟住我就喺度祈禱，可唔可以俾一個適合舞台俾我去唱？過咗一、兩日，就見到王祖藍為藝人之家搞40周年演唱會，因為我冇祖藍電話，我就同阿Bob講，之後好快同祖藍傾咗個電話，祖藍好好人，好快幫忙，成就咗呢件事發生。」
談到身體狀況，阿Nat坦言唔太好，「啱啱過去嗰幾個月，個腫瘤都大咗好多，谷到好大，見到都覺得幾肉酸，最近又轉咗西藥，轉咗藥又加咗中藥，所以feel到裏面好多反應，好似喺度打緊仗，都幾影響心情。有時會覺得有人夾你、撕你嗰啲痛，但anyway啦，都係要保持心境開朗，我相信裏面work緊嘅，一路都係咁面對，一有啲負面情緒，即刻用返正面方向去控制返自己思想。」
阿Nat透露，因為腫瘤變大速度快，無奈要開始一種另類治療，但她暫時也不想公開太多細節，她只說︰「真係好痛㗎，呢種治療要放血，如果見到有效果，我先再講多少少！」
受訪者言論純屬個人意見 並不代表本刊立場