無綫歌唱比賽《聲秀》上周日（2日）舉行決賽，經過八強激戰，最終由實力唱將馮熙燮奪得冠軍，柯雨霏榮獲亞軍，而胡子貝則同時贏得季軍及「觀眾熱選聲秀大獎」兩項殊榮。不過，當晚主持陳懿德的表現卻意外成為全場焦點。陳懿德當晚多次出錯，除了誤報分數及名次、將代表燈號讀錯外，甚至在宣布季軍時，一度錯將穎喬報為得獎者，令真正的季軍胡子貝與穎喬都面露尷尬。加上她多次無故提及緋聞男友羅天宇，被網民狠批「甩轆連場」，更有人建議無綫應換回森美或小儀主持。
沉寂多日後，陳懿德昨日（7日）終於「上水」發表長文道歉，開首就坦承錯誤：「錯就要認，打就要企定，首先想講對唔住，容許我沉澱咗幾日，今次嘅表現的確唔好，所以到呢刻，我都無辦法放過自己。」她表示雖然不少人勸她不要看負評，但認為自己有責任面對觀眾意見：「comment得嘅其實都係觀眾，而我係有責任照顧每一位觀眾嘅感受，多謝你哋願意花時間畀最直接嘅建議我，亦讓我知道，我仲有好多地方需要改善。如果讓你失望了、唔舒服了，對唔住。」
她自言對自己要求極高：「熟悉我嘅人都知道我係一個對自己好harsh嘅人，即使係一個其他人未必睇得出嘅小過失，我都已在心中唾罵咗自己過萬次，更何況係今次嘅表現，所以相信我，我對自己嘅憤怒、失望、怪責唔會比大家少。完show之後，有人問我：『你覺得點？』我話：『我覺得自己係零。』但其實一早已經想擔起劊子手的角色替自己行刑。」
對於宣布季軍出錯一事，她再次向節目組及選手道歉：「關於宣布季軍，喺度再次同節目組、子貝、Ziva講聲對唔住。作為主持造成咁嘅場面，我責無旁貸，難辭其咎，一定抵鬧。當下我真係唔應該淨係依賴個highlight，係應該再望多次咁多條bar嘅高度，係應該寧願再望多幾秒、肯定、再宣布，係應該再三fact check，我係應該作最後把關嘅位置，但我當下做唔到，呢個都係我最嬲自己嘅位，再次講聲對唔住。」
她坦言這幾天情緒低落，但收到不少前輩、同事與觀眾的鼓勵訊息，令她重新振作：「原諒我有種愧對你哋，唔知點面對你哋嘅感覺，所以我都覆得好慢，但多謝你哋令我知道我唔係自己一個，更加多謝你哋提醒我唔好失去對自己嘅信心，唔好放棄。係你哋嘅愛令我覺得我要振作啲先得，我應承你哋主持係我好熱愛嘅事，我唔會放棄。」
最後，陳懿德以積極態度面對批評，表示會從錯誤中成長：「人生一係成功，一係成長。雖然今次唔成功，但我會重新審視自己，從失敗中成長。雖然跌得好痛，但我會努力飛得更高。我唔會要求大家一定要喜歡我，但我會努力一步一步令你哋改觀。以前我會用200分嘅努力去準備，日後我會用400分嘅努力去彌補，多謝。」
