《聲秀》季軍胡子貝今日（15日）推出首支派台歌《情完節》，顧名思義就是在情人節分手，之後一天就是「情完節」。他被問到會否勾起自己分手回憶，坦言：「我唔會特登記得分手日子，感情過去咗就要灑脫啲，唔好活在過去。不過我相信呢首歌會引起好多人共鳴，因為每個人分手都會有一個屬於自己嘅『情完節』。」
作為《聲秀》第三位推出個人單曲的學員，胡子貝感激比賽後三個月就有機會出歌：「好快就有得出歌，心情好激動！之前喺《聲秀》畢業演唱會都唱過，但錄音室版本同唱Live有唔同嘅演繹，希望係一個新嘅起點，等大家重新認識我。」
新歌MV邀得好友柯雨霏（Ophelia）擔任女主角，她笑言第一次拍MV就要做「渣女」：「估唔到第一次做女主角就要做渣女，我最初喺子貝面前扮乖乖女，但實質係一個玩家，玩弄佢感情。」胡子貝更自爆MV情節勾起當年「做兵」回憶：「頭先Ophelia講咗句『你係一個好人』，即刻令我諗返起以前做兵嘅經歷。」
雖然MV中有不少甜蜜親密場面，但兩人老友鬼鬼，Ophelia笑說：「我哋本身friend，呢啲場面易處理啲，肢體接觸冇咁尷尬。有一幕鼻貼鼻睇落好sweet，其實大家喺度講緊無聊嘢互相嘲笑緊。」胡子貝則笑言：「其實會尷尬㗎！對望嘅時候望幾秒就笑場喇。」
談到最深刻的拍攝片段，兩人異口同聲指是最後一場分手戲。胡子貝說：「呢場戲要好激動，導演要我逼到300%情緒大聲嗌出嚟，拍到好肉緊！」Ophelia補充：「我哋兩個都鬧到眼濕濕，好投入好唔開心。」她更爆笑透露拍攝花絮：「呢場拍咗好多次，每次都要諗唔同嘢鬧佢，有次我鬧到唔知鬧咩好，反正都唔收音，我就問導演『我走得未呀！』成隊crew笑晒，好彩子貝冇笑，最後順利完成。」
