MC張天賦說，小時候的目標，當然希望做「世一」，但成長之後發現，原來「世一」不是表面那麼開心，或者值得開心的事，「因為同時你要背負好多責任、背負好多壓力、情緒和意見，如果有得揀，我可能做世二、三、四，冇咁大風頭、冇咁注目，我諗會開心啲！當然，要假設咗我係『世一』先啦，我暫時未到嗰個位，到我真係到咗，再問多一次呢條問題，又可能到時我會享受呢？」
未做歌手前，MC做過不少行業，「數得出應該都有做過，餐廳、整冷氣、做sales、電訊公司，如果依家MC冇做歌手，會唔會掂到音樂？坦白講，我諗自己好難靠幕後入到呢行，可能都係做一啲跟口才有關行業，我覺得自己都係死剩把口。」
的確，MC說話幾有娛樂性，看他的直播不難看到真性情，「可能我講嘢毫無保留，起碼將七成嘅自己俾晒出嚟，我又冇偶包，缺點又好、優點又好，都係屬於張天賦嘅嘢，大家又覺得幾搞笑喎，呢個就係我！我唔希望身份會影響到我去待人處事，我希望保持自己性格，係會有啲『張三歲』寸寸貢，由出道到依家，我性格應該都冇乜點變。」
樂壇踏入新世代，個個「玩法」不同，要突圍而出，識玩IG、Threads是基本，可是MC對social media卻不太熱衷，「我覺得每個年代歌手，要具備條件都唔一樣，依家係一個科技非常之發達年代，會有好多途徑可以接觸到觀眾。我好少經營社交媒體，因為我覺得自己珍惜面對面相處，多過虛擬網絡交流，平時同朋友都係約出嚟傾，我都仲係會煲電話粥，我認為打電話比文字實體好多，我幾反傳統！」
最近跟吳君如合演的新片《我談的那場戀愛》，講一段網騙情緣，MC說︰「呢個角色同我有幾分相似，都係講一個一開始一事無成少年，誤打誤撞入咗間詐騙公司，跟住搵到一樣好似能夠證明到自己嘅事，終於有被人需要嘅時候。」
談到交友App，MC竟然有玩過，「我覺得有好有唔好，坦白講，交友App可以令到人與人之間多咗一個交流途徑，不過係咪最好途徑呢？我又未必覺得係，我好少用social media原因，因為我會嚮往以前識朋友方法，親身見面，透過大家面對面交流傾偈，去建立彼此信任和印象；相反依家好多時social media，大家只靠你嘅profile，你po出嚟嘅相，而去判斷你係一個咩人，我覺得已經少咗真實性，多咗層隔膜。我有冇玩過？有㗎！有時有啲說話，唔希望同身邊認識嘅人講，我會想搵一個完全唔認識自己嘅人分享，因為講完，佢都唔知你係邊個，我唔會用真名玩囉！哈哈！」
封面攝影協力︰Jack Yuen、Ryan Wong、Jason Ho
花絮攝影︰洪志富
形象︰Nana Wong、Anthony Tong
造型協力︰Music Ho、Ingrid Ma、Kelly Janice
美術設計︰Lily Mak
化妝︰Circle Chong
髮型︰Cliff @Myos
服飾︰LOUIS VUITTON、SHIATZY CHEN、CHEN PENG、HOMME PLISSÉ ISSEY MIYAKE
