可能早兩晚與那個入侵農場學堂的賤種搏殺，兩日來四肢癱瘓，如果我真的用雙指挖走他的眼珠來為ＢＢ洩憤，可能成為一家人的陰影，難得今次瑪莉亞突然女超人上身，全靠她喝止我惡向膽邊生。
否則大狀師也難為我令別人一世失明而脫罪。這一役，可能促使我退化，見凳就坐，瑪莉亞拿着我的手機出來樹蔭下找我。「阿Howard猛搵你想同你傾幾句，佢哋幾個，聽朝就上九點幾班穖返嚟。Howard，搵到你daddy啦……」
「喂？你哋趕返嚟做乜？做好晒啲嘢先喇。」
「婆波同ＢＢ傾電話，唔係ＢＢ喊，佢一問婆波幾時返嚟呀，就搞到Auntie Mary喊到講唔到嘢，即刻要我哋改早一班穖。」
「我哎吔家姊最錫啲ＢＢ仔，阿Benedict出世嗰陣，佢錫到燶，連行公司，打牌都唔肯去，到阿Ben而家大個仔，佢就當正ＢＢ等於係佢個孫，你話如果今次個衰人燒傷阿ＢＢ塊面，我諗家姊佢會叫人將條友斬開十幾碌，再餵俾狗食……」
「你兩個都唔好煲粥喇，ＢＢ好耐都冇得到阿烤鑊爸爸同佢補習，佢都掛住你同阿Pamela。」
「阿黑炭仔同蓋老闆去咗曼徹斯特，聽到單嘢，都嬲到震晒，話如果佢個人喺度，就踢到條友春……總之猛講粗口……」
「佢臨飛之前，已經再組織咗個自衞隊，佢話農場太大，保安唔夠，佢一返嚟實最着緊呢件事。佢哋三個後生仔，我第一次見，就知佢最腳踏實地。」
「哈，我同意，佢仲託我呢個ＢＢ嘅哎吔老竇，買兩盒Harrods嘅朱古力，話係佢趕唔切返嚟，親手送俾ＢＢ同佢有難同當嘅阿丹仔。好真心呵？」
「好啦講夠啦，你daddy同人打交，梗係傷咗啲元氣，成日瞌眼瞓，幫我問候你岳母喇，下一次帶埋佢返嚟，我陪佢周圍去吖，收線喇。」遷移到大馬的瑪莉亞，從沒有跟我比賽脫胎換骨，這個星期就接二連三見真章，在另一忽山旮旯，發掘到可以執死雞就地變製片廠，獻計給蓋老闆，眾人另眼相看。初到貴境時，遇上老闆被對頭人幫會追擊，我等大小一家幾乎歸西，她已開始趨向膽正命平，可能回到學堂也黐餐上武術自衞堂，前晚牛刀初試，勇不可擋。「我成日記番起喺慈善騷嗰次，大難臨頭我仲咁符碌，睇住你同Mary姐搏晒老命，我就飲咗豬肉湯咁，之後我成日摑醒自己，連ＢＢ都識得撥開啲衰人枝手槍，我點解好似蠟像咁喺度睇戲……你知唔知，你前晚又試拼死無大害，我係可以鋤多個衰人一嘢，佢瓜咗我頂多為你為ＢＢ坐監，但你兩個打到唔清唔楚，撻嚟撻去，兩個都著住白笠衫，嗰度又黑麻麻，我係可以唔理三七廿一，狼胎啲鋤落去先，但如果我鋤錯咗你，我以後都唔駛做人……俾我坐吓你膝頭，得唔得？」
學堂人出人入，早已當正我們是已婚夫婦，「我上次結婚都冇乜點拍拖，老竇老母吹雞叫結婚，咁咪結到夠，我仲諗住，會有得結幾多次婚？……」
「我都冇聽過你咁講，幾好聽，唔好講到瞓着。」
「而家咁睇，我哋結咗婚會好危險，分分鐘想離婚就大件事，你記吓，我哋撞到嗰日開始，我哋已經日日拍緊拖，日日都有啲估唔到嘅事發生，我唔信有好多人好似我哋咁，我情願唔好停，我哋拍拖，拍到是但一個行先，唔緊要……」
「你俾我瞌一陣……你搶咗我想講嘅嘢嚟講先……坐歪少少，同我遮住啲太陽……」