MC張天賦一連五場《E=MC² 演唱會2026》，昨晚（11日）於紅館圓滿落幕。尾場演出中，MC徹底「大解放」，狀態大勇，更邀得湯令山（Gareth.T）及昔日busking戰友希晉@ROVER、Kwan T.擔任嘉賓，全場高潮迭起，歌迷尖叫聲震耳欲聾。
演唱會於晚上8時半準時開鑼，MC一上台即高呼：「終於唔需要再留力！當我竭盡全力嘅時候，希望大家都唔好吝嗇掌聲！」全場隨即沸騰。中場他飲水稍歇時，觀眾齊聲大叫「除衫」，MC鬼馬回應：「未咁早！」隨後他踏上粉紅色巨型雀鳥裝置，升上4米高空繞場演繹《老派約會之必要》，雖然因技術問題未能繞足全場，但他笑言能升上半空已非常滿足。
全晚驚喜不斷，湯令山（Gareth.T）現身合唱《泥菩薩》即成焦點。MC透露這首歌背後有個小故事：「May姐問我戴長假髮去好遠拍MV得唔得，原來係Gareth想同我合作呢首合唱歌，我一聽就好鍾意，但後來因某些原因冇得唱，今日終於喺紅館將佢帶返舞台！」兩人其後回憶相識點滴，MC大讚Gareth當年Annual Dinner自彈自唱《勁浪漫 超溫馨》英文版已令他感覺「好正」，更感謝對方為他首個紅館騷編排音樂。Gareth則分享曾被網民狠批廣東話發音，MC一句「唔使理啲comment，你已經做得好好」令他銘記至今。而Gareth更即場公布好消息：「紅館，2027年1月！」他宣布明年首度舉行個人紅館演唱會，全場歡呼聲不絕，隨後他獨唱《去北極忘記你》為自己個唱預熱。
MC換裝後再掀另一高潮，請出希晉@ROVER及Kwan T.，三人合唱出道前在街頭busking時共同創作的《Butterfly》。MC坦言這首歌多年來從未在舞台上正式合唱過，今次邀請兩位老友同台，形容是「成就解鎖」，三人默契十足的演出充滿真摯友情溫度，令觀眾聽得如癡如醉。
演唱會中段，MC獻唱《小心地滑》將氣氛推至頂峰；在「盲盒情歌」環節中，他演繹《隔牆有耳》與《與我無關》後，特別感謝徐浩、排舞師Maxi及經理人May姐，更多謝歌迷接受他不完美的一面，坦言曾歷低潮，全靠觀眾支持才能走到今天。尾聲時，他以《七點半鐘的陽光》壓軸，唱至最後明顯眼泛淚光，但強行忍住，堅持完成全曲，全場掌聲雷動，場面感人。演唱會於10時55分結束，歌迷不停大叫「安歌」，久久不願離場。
MC於完場後受訪時直言尾場是「大解放」，「今日先搵到真正嘅MC！前面幾場有留力，但今次輕鬆好多，處理得更好。」為了今次演出，他成功減去約15磅，體脂減6%，內臟脂肪由7降至4，腰圍由32吋縮至29、30吋，被問到褲鈕變鬆是否關瘦身事，他即搞笑否認：「真係唔關事，粒鈕扣得唔實啫！」至於日後會否挑戰更多場數，他笑言「睇公司安排」，雖想越多越好，但也要兼顧身體狀態，「而家理解到自己身體，未夠好啦，可以更好！聲音方面已經控制得好多，希望下次挑戰超過五場。」
談到完場強忍淚水，MC直言：「最後一首歌壓力釋放晒，但忽然諗起自己係歌手，最後一首歌唔可以失禮，所以盡能力忍住。」他感激歌迷多年支持，期望將來有更多機會再踏紅館，帶來更精彩演出。
