鄭秀文（Sammi）一連三場啟德主場館「答謝會」，昨晚（11日）第二場驚喜迎來「重量級嘉賓」——老公許志安！許氏夫婦世紀合體，手拖手合唱《一步一生》與《其實你心裏有沒有我》，擲下粉紅色震撼彈，全場尖叫聲幾近掀翻場館屋頂。
Sammi坦言接獲演唱會延期通知後，經歷前所未有的考驗，但她選擇積極面對：「今次答謝會對我同觀眾都係好大嘅體驗，所有嘢都好突發。開show前幾日收到消息，一切叫『停』，呢個『停』字相當之重。既然上天畀咗呢個考驗我，我就接受佢！」然而她自覺需要更大力量陪伴，於是臨時邀約一位特別嘉賓：「原本今晚係冇任何嘉賓，但發生呢件事，我覺得好想有一份更加大嘅力量。前幾日我同呢個人講：『你可唔可以嚟做我嘉賓？我記得有一年紅館開騷冇晒電嘅時候，我叫救命，第一個就諗到你。』」
音樂奏起《一步一生》，許志安升上台，全場歡呼。安仔一邊唱一邊走向伸展台中間的Sammi，兩人慢慢靠近，當Sammi唱到——「沿途就算跌 要跌得好看 才能不自責 報答別人厚望 然而誰明白我沒你們所想的堅壯 我很想找個人 對我說別怯慌」時緊握拳頭，彷彿借歌詞訴說心聲。四目交投之際，安仔輕輕牽起她的手，給予最溫柔的力量，場面感動萬分。Sammi隨後對安仔說：「多謝你！前幾日臨時臨急問你可唔可以陪我企喺呢個台？因為今晚第二晚，我好唔想自己一個人。」她又笑指臨時加嘉賓要搞保險，「都整得切，幫你買咗保險。」觀眾被她的反差萌逗笑，安仔則一直甜笑看着她。
兩人其後合唱經典作品《其實你心裡有沒有我》，Sammi笑說：「幾廿年嘅歌，好耐無唱。」安仔又忍不住笑。他們手拖手邊行邊唱，最後對望、傻笑、擁抱，溫馨滿瀉。安仔轉身離場時，Sammi更拋出一句：「屋企見，拜拜，See you later！」全場再度爆笑，場面既甜蜜又搞笑。
巡遊環節Sammi換上小紅車，演唱《衝動點唱》和《熱愛島》，觀眾湧上前熱情揮手，氣氛熾熱。Encore時她換上珍珠白色露肩裙唱出《終身美麗》，透露這條裙是特別為香港站歌迷而設：「我喺大馬演唱會著咗條類似style嘅裙，觀眾都話好靚，香港場我都好想著返畀大家睇，呢條係新㗎！」盡顯「寵粉天花板」本色。她再三叮囑觀眾好好保存門票，可選擇退票或之後憑票入場欣賞正式演唱會。最後她感激觀眾支持：「啟德個場再大都比不上你哋嘅包容同對我嘅愛咁大，多謝！」
