《農夫香港最好笑嘅演唱會》昨晚（9日）在紅館迎來第二場，驚喜浪接浪。演出中段，農夫突然邀得MC張天賦擔任神秘嘉賓，全場尖叫聲震耳欲聾。三人首度同台合唱經典金曲《學海無涯》，MC全程不用提詞機，一字不漏完整Rap出整首歌，咬字清晰、節奏精準，連農夫也露出難以置信的表情，觀眾紛紛拍爛手掌。
農夫笑言邀請MC，皆因全香港得他一個敢叫「MC」，名字夠Hip Hop，更大讚他表現超水準。陸永說：「大家有無留意？我真係未見過有嘉賓可以Rap咁多，佢要求唔要提詞機。佢真係識我哋啲歌，我好肯定佢識過你哋（觀眾）。」MC謙虛回應：「因為你哋話唱《學海無涯》，我就‥‥‥」陸永即搶答：「就開始背喇。哈哈！」
MC又自爆從小聽農夫的歌長大：「最早期我聽《我的野蠻女友》、《奇蹟》、《韓國勁舞權》，仲有《十年人事》、《十七年華》……好多好多。細個溫書嗰陣，我聽已經係DSE啦，我記得嗰時仲係小學，唔用正途去下載音樂，放入MP3入面聽㗎！你哋係我人生list上面其中一組人，我好希望可以嚟到你哋演唱會做嘉賓。係人都知，我做任何演唱會最緊要一定要提詞機，但今日我覺得，你哋啲歌，如果我背唔到，就唔配上嚟做嘉賓！真㗎！所以我今日真係好開心，好少我做嘉賓係冇壓力㗎，呢度真係好歡天喜地。」全場再度報以熱烈掌聲，MC的真誠與實力贏盡歡心。
正當觀眾以為最後一首歌《高舉隻手》唱完便圓滿結束，豈料農夫再殺大家一個措手不及——兩人所屬的公司「農作天下」竟在完場後舉行「開張大典」。在觀眾歡呼聲中，農夫邀出幕後「白武士」兼老闆古天樂，一同上台切燒豬，全場驚喜得嘩聲四起。
大螢幕上出現「農作天下」開張盛典畫面，農夫向觀眾介紹：「你哋有冇發覺？農作天下，點解有『天下』兩個字？So fa So Cool，又有個『Cool』字？我哋公司之前未公開做過開張大典，好似有啲嘢未完成，喺今日咁開心嘅時刻，不如我哋全場一齊做一個開張儀式好唔好？有請我哋公司國際榮譽霸道總裁……」舞台大門打開，古天樂步出，全場觀眾即時站起歡呼，幾乎叫裂紅館。
古天樂大讚整晚氣氛一流，幾乎全程站着觀賞，他笑言：「我諗呢樣嘢係咁解：乜嘢叫棟篤笑？你哋帶畀佢哋歡樂，佢哋今日棟篤喺度支持你哋。」陸永即取笑老闆：「我懷疑你呢段度咗三個禮拜，哈哈。」C君接着說：「拯救一間公司可能要白武士，但投資一間公司就要黑武士。多謝古老闆！老闆你驚唔驚我哋叫你嚟投資，將會係一個世紀大騙局？哈哈。」古仔回應：「多多支持，多多指教，今日香港需要開心歡樂！」
三人之後在台上切燒豬，齊聲祝願：「風生水起，笑口常開。日後業務好唔好就唔知，一切交畀天命。」切豬儀式後，農夫即拉着古仔，認為他不可能單純切豬這麼簡單，全場觀眾亦起哄。古仔在農夫「半推半就」下戴起耳機，與他們及全場觀眾合唱經典金曲《天命最高》，為演唱會劃上震撼句號。
