香港女團的歷史比K-Pop女團更早，由八十年代尾至今，出產了不少女團，當中以千禧年出道的Twins最成功！要成功，公司和成員都要夠硬淨，才能鬥「長命」。
出道僅三年的COLLAR，論知名度，她們算是火速上位，經歷蘇芷晴（So Ching）離隊八變七、MakerVille行政總裁魯庭暉離職，COLLAR都處於風尖浪口，但每次面對傳媒對答時，分分鐘比師兄們更成熟。
隊長沈貞巧（Gao）今次於訪問中，她最常說的一句是：「其實我哋已經好幸運！」知足不辱，知止不殆，或許這就是偶像團體成功的必修科。
COLLAR成員都是由ViuTV選秀節目《全民造星IV》的決賽參賽者選出，比賽結束後兩星期，便宣布成團，最初出道時由八名成員組成，隊長由沈貞巧（Gao）擔任，其他成員包括王家晴（Candy）、許軼（Day）、蘇雅琳（Ivy）、邱彥筒（Marf）、李芯駖（Sumling）及陳泳伽（Winka），而蘇芷晴（So Ching）自三年前舞蹈員男友李啟言（阿Mo）在MIRROR演唱會上發生嚴重意外後，已於二O二三年五月十日宣布離隊。
跟阿Gao訪問當日，Mo爸李盛林在最新代禱信中，公開稱經歷三年治療的阿Mo，在治療師和護工的陪同與協助下去睇演唱會，外出時間更長達逾八小時。對此，Gao沒有選擇避而不談，問她有沒有與So Ching聯絡？她說︰「我都有留意佢嘅動態，有睇見到佢啲post，但係盡量都俾返啲空間佢，（So Ching在IG透露身體不斷響警號？）希望佢身體健康，我都有follow佢嘅狀態，所以希望大家，真係俾啲空間佢去調理自己！今日見到阿Mo可以去睇演唱會，其實一路都有follow up阿Mo嘅狀態，咁梗係好啦，同埋佢係好鍾意performance嘛！」
香港教跳舞好難搵食
舞者都是求演出機會，尤其在香港，賺錢從來都不是香港舞者的目標。同屬舞者出身的Gao，早於大學時期，已積極參加校內舞蹈社團，比較少人知道的，是當時她竟然是芯駖的學生，二人關係一直亦師亦友。
熱愛跳舞的Gao，畢業後曾為生計而放棄跳舞，雖然能靠教跳舞維生，卻難以負起養活家人的責任，一度讓她十分掙扎，但她的父親卻鼓勵她勇敢追夢，在父親的支持下，最終Gao決心以跳舞老師這個自由工作者身份，繼續跳舞，最終才成功嬴得《造星IV》亞軍。
Gao說︰「香港教跳舞搵食真係好難，有啲人係可以賺到，賺到嘅意思，都唔係話會發達嗰種，所以睇你自己點睇！我覺得因為香港好細，然後個pool都唔大，大家都喺一個好細嘅pool求生，所以會導致呢個行業唔係好搵到食，又或者未係咁普及囉！當然，依家愈來愈多人知道，開始多人有興趣想學吓，呢個都係大家希望見到嘅局面，但我覺得有時候都係靠跳緊舞嗰班人，出力去做多啲嘢囉！」
當時Gao為了減輕家中經濟壓力，曾投身其他行業，「我唔算好多班教，因為我係喺一個studio幫手，除咗教跳舞，我要做埋receptionist，其實當時自己心裏面都有個約定，淨係喺呢個老師度教班，因為只係想幫佢，為呢個studio出力，有時間就接下大學、中學排舞，同埋我哋嘅範疇係underground街舞，教班都有分嘅，譬如一啲班比較多人容易接觸到，嗰邊就會比較多人學，街舞其實依家慢慢好似多返啲，但其實仍然見來見去都係嗰班人。」
街舞包含多種風格，例如霹靂舞Breaking、鎖舞Locking與機械舞Popping等， Gao與MIRROR隊長楊樂文都擅長街舞，而Gao出道時已被稱為「女版Lokman」或「Lok-woman」。Gao出道前也有威水史，她曾與其他Locker組隊參加比賽並奪得《World of Dance Hong Kong 2019》亞軍，更成為首隊進軍到美國總決賽的香港隊伍。
在香港樂壇，最好就是周身刀，張張利。Gao除了音樂，也開始參與綜藝、劇集的演出，今年更首次挑戰舞台劇，參演陳焯威導演、葉念琛編劇的全新原創舞台劇《鱷魚之吻》，與近年屢獲提名及得獎的談善言，聯手擔當雙女主。
入行三年，問Gao怎樣形容這段日子？她說︰「幸運囉，因為好感恩，我哋由一個團隊去起步，有時候如果自己一個人去開始一件事，總會有一種戰戰兢兢同不安，但我哋係由一個團隊去出發，大家陪住大家囉，大家都有不安嘅時候，互相去幫吓，大家撐住，心靈上又好，任何嘢上面都好，我覺得我哋幸運嘅位係，其實我哋已經比好多人多咗好多機會，入行後都見到有啲人可能好有talent，某個範疇好叻，又或者已經做咗啲好好作品，但係都未必有人睇到，或者真係要磨練好長一段時間，先至有少少成果。對歌手來講，有啲可能做咗歌手十年，先可以去開自己第一個演唱會，佢哋都一樣咁努力，咁有passion，其實我哋已經好幸運！得多定失多？一定係得到多，就好似我，其實我嘅起步點，已經得到一班人喺身邊，姑勿論係我哋七個女仔，其實背後仲有一大班人，唔單單COLLAR七個人！點為之失去呢？我冇乜特別諗到啲咩我失去咗，因為我會覺得，如果我timeline裏面未遇到嗰件事，只係我未遇到啫，就唔係叫失去咗，所以，time by time一路去做嘅時候，其實一定係得多過失！」
隊員穩定返我自己的心
COLLAR出道短短三年，已經舉行了三次演唱會，她們每次都會騷後檢討，「我哋完咗演唱會即晚就已經檢討，大家都會分享吓感受，我覺得今次好明顯見到大家都成長咗，每個階段都有唔同成長，但今次呢個騷，可以話係一個少少高壓狀態發生，見到大家都處理自己嗰part之餘，亦好用心去溝通，然後大家都想做到一啲大家喜歡嘅東西，呢個情況下，係一定會有進步，心態上，七個人都成熟咗好多。」
今年，MIRROR宣布不出席《叱咤頒獎禮》，COLLAR被看好有機會問鼎組合金獎。
經歷成員退團、公司人事變動，作為隊長，如何穩定軍心？「其實喺COLLAR做隊長，係唔辛苦嘅！可能大家成日會聽到，話『多謝你撐住COLLAR』、『帶領COLLAR』乜乜乜，首先我唔會去諗自己有冇做呢樣嘢，因為其實我哋都係好自然去make一個team，而唔係覺得我帶住大家去做，應該話有好多人帶住我哋行，even我哋自己七個人入面，我都冇覺得有好明確有一個leader，因為唔同範疇有唔同leader，搵嘢食，一定係Ivy，傾心事，一定Winka係leader，佢好願意去share自己好多感受，呢啲唔同chemistry，先至會build up到COLLAR！如果要話我做得最多嘅，就係當大家混亂嘅時候，我會整合大家意見，同埋令到大家返回去正體入面，呢個就係我做得最多嘅嘢，算唔算穩定軍心呢？我唔知，可能for佢哋來講，有唔同程度，但for我來講，有時我反而係俾其他人，穩定返我自己嘅心。」
COLLAR出道時，MakerVille行政總裁魯庭暉解釋，女團名稱有兩個意思，分別是衫領和鎖骨，代表女團風格多變，亦是連結腦部和心的部分，希望COLLAR的作品能讓觀眾用腦思考、用心感受，每次表演都能夠「hold your breath」。
談到魯生這位伯樂離職，Gao直言事前已經知道，「有通知過我哋，魯生都係好sincere咁去同我哋溝通，我覺得佢要講，或者佢要share嘅嘢，已經喺within我哋成個core嘅過程中做晒，教咗我哋好多嘢，我亦知道佢想做啲乜，所以，我諗個起步點有佢呢個方向，之後點行落去，就靠我哋自己繼續努力。」
今年，MIRROR宣布不出席《叱咤頒獎禮》，COLLAR被看好有機會問鼎組合金獎，若果成真，COLLAR將是繼二OO五年Twins獲得組合金獎後，相隔二十年，再有女子組合奪得得這個大獎，已轉會華納的魯生，如果在台下的話，應該會十分欣慰。
封面攝影：Matt Yau
協力：Jack Yuen、Gary Chan
花絮攝影：洪志富
形象：Nana Wong
造型協力：Haley Chau
美術設計：Sammy Yeung
化妝：Cathy Zhang@powderclub_hk
髮型：Crystal Chan
服飾：Demo、Isabel Marant、Issey Miyake、Sandro、Sheer、Swarovski
