臨時臨急都生安白造到一場絕無冷場，驚心動魄的折子戲，將太子女彭美拉的後底乸「等天收」，嚇到鼻哥窿冇肉，無鞋挽屐走。我等幾個人在廳中窗口向汽車嗡起口面舉手送別，三秒後已爆笑到要碌地，剛才失場的氣水蓋，因避忌那位不速之客，不便出現，從二樓下來也笑個不停。「乜得阿ＢＢ妹咁叻，唔係天才童星呀，係天才嬰兒呀，阿嫂抱番佢上去沖涼，佢仲走入我房扮鬼嚇我添呀，哈哈……」家姊冇大家咁好氣。「我都唔明呢個『鄧天秋』，乜得佢咁得閒，一落機就踩入嚟，我都係唔明佢想點……阿師弟，話晒呢間屋……阿太子女個細佬，真係得嗰一兩歲就喺呢度死咗，我哋借佢嚟整古做怪，都唔係幾啱規矩嘅，聽日你去問吓啲師父，我哋買啲乜嘢返嚟拜吓個細路哥……」我愈聽愈打個冷顫。「咁我哋頭先冇問請過人哋，冇問聲佢攞個版權，就叫阿ＢＢ扮佢去嚇個後底乸……」
「我真係保你大，呢啲嘢唔攞得嚟講笑㗎，仲有你頭先放個屁，係就係夠大聲，嚇到人打個突，但臭到我都掩住個鼻講唔到嘢。」
「有啲屁會聞到唔臭嘅咩，阿汽水蓋，呵？」但蓋大班冇陪我癲，面口反而煞有介事：「個細佬哥幾時死㗎？」
「頭先喺車，阿彭美拉話自己兩三歲個細佬出世，跟住就睇住佢一歲就俾人落咗降頭就死咗……」
「哎吔，我哋整走咗嗰個後底乸，一味笑餐死，好心你兩個唔好再開個咁嘅話題。」
「咦？咁頭先咪卡士錯咗，唔應該叫阿ＢＢ扮個一歲就死嘅男仔喎，我哋數吓手指，阿孝活話阿彭美拉都三十三咯，當佢冇報細數喇，即係佢個細佬，而家都三張有突喇，牛高馬大至啱喎，我哋冇乜邊個啱扮佢。」
「好心喇，就嚟天黑啦，呢啲嘢不適宜講，等阿師弟你聽朝一起身就去作個福……阿孝活返嚟啦……做乜佢哋兩母女臨上車，仲有乜嘢講？」
「我唔知阿Pamela講真定講假，佢或者幫我哋嚇多幾嘢佢阿媽，話離遠好似見到佢阿細佬企喺大門口喎，連我都毛管戙一戙。」
「我都開始有啲後悔咁嚟整蠱佢阿媽，不如我哋早啲扯，出返去食飯，喂阿蓋仔你做乜唔聲唔聲咁？」
「媽打，你聽咗就算，唔好咁認真，我一嚟咗吉隆坡，你哋咪話柄我嚟山旮旯呢度住，安全啲，但我嗰幾晚，屙親夜尿，都見到下面天井有個ＢＢ仔走走吓，我咁大個人乜嘢未見過吖，諗都冇諗，問阿彭美拉喺度過夜啲保鑣，話怕係隔籬屋啲細佬哥喎，我心諗，講笑咩，隔籬屋？行半粒鐘都未嚟到喇，仲識得行入嚟人哋個天井？」
「唉吔，你哋有冇『景然棧』嘅電話？訂位喇，我哋即刻去㗎啦。」
「蓋Uncle，你見到佢乜嘢樣㗎？」
「咁細個，一仆一碌咁走走吓，日光日白，你會想埋去抱吓佢……」
「咁係佢啦，Daddy我哋嗰次第一次入嚟，用視像同蓋Uncle傾偈嗰次呢，我去後面廚房煲咖啡，我都見過，當時以為係看屋成家人住喺度，但個咁細嘅細路哥，應該係蓋Uncle見到嗰個……Daddy冇聽到你有見到過？」
「唔好預我，唔使客氣，我好爛瞓嘅，我冇本事湊兩個ＢＢ，家姊我哋嗌阿Maria同ＢＢ落嚟一齊行先。」家姊見師弟聽得津津有味，「喂，你仲未打電話有冇位？作死呀？」師弟嫌未被鬧夠。「我都有見過㗎……不過喺深圳，唔係喺大馬呢度……」家姊已披回大衣，用手袋摑師弟頭，「講夠未，講夠未，罰你今晚扐啲宵夜返嚟，見到一歲又好，三張嘢又好，你就同佢哋一齊食喇吓。」
「咁你哋又話隻……個細路應該而家都三十幾嘅？」師弟搶先開大門前但仍回頭追問，再吃多一下手袋襲擊。