無綫台慶劇《新聞女王2》本周一（15日）迎來大結局，佘詩曼打破續集魔咒，再次帶動追劇氣氛，結局周跨平台直播收視最高21.4點（138萬觀眾），盤踞收視榜首位，再次證明這位三屆視后在港劇的魅力。
近年韓劇、日劇、陸劇和泰劇都打出一遍天，曾經站在亞洲前線的港劇卻落後，到底發生甚麼事？有危就有機，阿佘認為已過了最難行的樽頸位，現在是「爬返起身」的時候，就算面對「AI巨輪」，影視界仍要創新自救才不會被淘汰。
由公司內部鬥爭，轉到業界競爭，《新聞女王2》多宗新聞故事也取材自真人真事，甚至有備受全球爭議的AI發展；世界首名人工智能（AI）生成的演員Tilly Norwood數個月前正式亮相，引發荷李活不少風波，對於AI對演員未來發展的影響，阿佘說︰「AI係一個好偉大嘅發明，亦都幫助到好多嘢，但亦都有某程度嘅傷害，講真，某程度上嘅取代一定有，但係大家要識得運用，我覺得因為AI係冇判斷能力，始終都係需要人類去駕馭，或者係控制點樣用，所以用家真係要有一個好正確嘅態度去處理呢件事，如果唔係就好容易出事，或者係偏離軌跡，對演員，我諗就唔會有好大嘅影響，咁當然你話全AI演員製作，點都會吸納到一班觀眾，但我覺得所有嘢都係一個cycle，可能呢段時間會流行咁玩，但其實我唔相信有溫度嘅人類，會長期鍾意冇溫度嘅作品，因為你feel唔到有血有肉嘅深度同體溫，又或者AI唔會分享到佢生活嘅經驗，因為佢冇任何經歷，其實電視劇又好、或者係電影又好，都係想反映生活上出現嘅一啲問題，或者曾經遭遇過嘅經驗，但AI係唔識問問題、亦都冇咁嘅experience，咁點分享呢？」
有一場戲阿佘要反轉演繹「AI主播文慧心」，但出來的效果觀眾竟以假亂真，「《新聞女王2》都有AI嘅製作，Man姐喺海邊報道嗰場戲係AI，但其實佢都要首先read我啲數據，我亦都要先做一次俾佢睇，先至做到呢一幕；但我同AI梁景仁嗰場係我自己演AI主播，我都練咗一陣，眨眼要好似有規律、拎頭又硬少少，演AI仲難過演真人呀！」
阿佘對港劇仍充滿信心，談及港劇近年的發展是否到了一個樽頸位？她並不認同，「我覺得係過咗個樽頸位了，因為之前有疫情，改變咗所有人睇劇睇電影嘅模式，鍾意喺屋企上網，我諗依家係一個重新爬返起身嘅階段，我相信唔係淨係香港，全球都係，呢個習慣係全球一齊改變緊，點樣可以令到觀眾重新去追劇？或者入去戲院睇戲？要加倍努力去創新，啲嘢可能要再貼地啲，我諗係欠缺一啲劇本，或者可能需要大量嘅編劇人才，演員當然係會少，計人口，香港得七百幾萬人，演員有幾多？其實你都數得晒出嚟，但有啲人口億億聲嘅，咁你比率都唔同咗，所以其實係唔夠人。」
《新聞女王2》之後，阿佘明年再有新劇《正義女神Themis》，亦是阿佘首次演律師題材的電視劇，「呢套應該出年播，未演過呢個範疇嘅角色，第一次，所以都好興奮，同埋好突然嘅，冇諗過突然間會接多套，因為prepare緊《新聞2》，突然間殺出呢個劇本，見到呢個題材已經有興趣。」
這次是阿佘與契爺許紹雄最後一次合演，劇集於去年已經完成拍攝，「今次契爺係飾演法官，以我記憶所及，佢可能冇演過，或者唔多演這類咁serious嘅角色，佢嗰條線嘅故事好好，我唔可以劇透，但係除咗法律之外，佢演父親嗰個位發揮都好大，我哋今次唔係演師徒、父女，佢係我上司，嗰陣冇覺得契爺身體有問題，背對白亦好精靈。」阿佘坦言契爺是開心果，從來都報喜不報憂，「咁一定係嘅，老實講，咁唔會帶自己屋企啲問題、唔開心嘅情緒去現場嘛，好多時，因為其實大家都知道演員係靠情緒去工作，咁所以都唔想影響對方嘅情緒，或者對手嘅情緒，通常我哋拍嘢嘅時候，都係以角色嘅情緒跟住行入去表演區。」
契爺有一句說話對阿佘影響很大，「佢成日都話唔好怕蝕底囉，成日都話無所謂啦，蝕少少唔緊要啦，又唔係會少咗忽肉，跟住我成日都話，你唔好咁樣啦，咁易話為咩都話好，佢每次都答，有乜所謂呀，人哋開心我又開心啫，佢就係咁嘅人。」
服裝︰Max Mara
場地︰香港文華東方酒店
