在香港樂壇，最好就是周身刀，張張利。隊長沈貞巧（Gao）除了音樂，也開始參與綜藝、劇集的演出，今年更首次挑戰舞台劇，參演陳焯威導演、葉念琛編劇的全新原創舞台劇《鱷魚之吻》，與近年屢獲提名及得獎的談善言，聯手擔當雙女主。
自信心低落時的一個提醒
今次這個舞台劇角色，與Gao的背景十分相似，她解釋︰「今次喺《鱷魚之吻》飾演一個叫做林小美嘅角色，係一個初出茅廬新進女演員，有熱誠，好有上進心，夢想係成為影后，佢嘅偶像就係談善言飾演嘅阿寶。今次呢個劇都係講一啲女演員心理狀態，同面對不同關口，可能人與人之間關係，或者自己內心掙扎，呢啲情感比較多！故事係基於一個女演員，呢個角色，的確同我背景有啲似，因為我都係出道咗三年幾，好多嘢對我嚟講都好新鮮，我試過唱歌、跳舞，又拍過啲綜藝、做主持，好多機會俾我去嘗試唔同嘅嘢，對於林小美呢個角色，共鳴感非常之強烈。」
演戲初哥，Gao今次跟其他演員一樣要通過試鏡，據悉試鏡期間，她的投入度極高，亦靈活運用肢體及眼神，以貼近舞台節奏的演繹，令葉念琛及陳焯威導演印象深刻。Gao說：「今次的確透過casting去得到角色，好幸運，揀咗我做呢個角色，嗰陣試鏡其實都冇乜話點樣，就係大家傾吓偈，跟住之後，甚至乎有段script都唔係我哋套劇，即興攞咗啲script嚟試，之後問返導演，點解揀我？佢話覺得我好符合小美呢個角色，因為我入到去同佢哋傾偈，當互相了解一下，佢就話覺得我同小美相似地方，就係好bright，覺得我俾到佢呢個感覺！for我來講，其實小美呢個角色，都係一個for自己嘅提醒，原來我去casting嘅時候，仲有人見到我嘅呢一面，有時當自己嘅自信心低落嘅時候，就記得返呢一點，就會令我覺得係一個提醒。」
Gao今年首次挑戰舞台劇，參演陳焯威導演、葉念琛編劇的全新原創舞台劇《鱷魚之吻》，與近年屢獲提名及得獎的談善言，聯手擔當雙女主。
雖然在劇集《冰上火花》、《出租大叔》與《麻甩媽咪》都演過戲，但舞台劇又是另一回事，沒有NG的，「呢排已經開始圍讀，過程入面，其實我好feel到嗰個團隊嘅bonding同埋合作，有時候未必係講緊自己角色，可能大家會一齊用好多時間去討論某一個角色，一齊去搵、一齊去發掘，其實成個感覺俾到我，就係一個好強好強teamwork！演舞台劇，我仲要係第一次，講真，當初可能有擔心過，但慢慢我就覺得，其實已經唔係好緊張，因為點都好，都會有人幫我。」
參加《造星》時，梁祖堯是Gao的導師，當時其實都打開了她對劇場的興趣，阿祖曾經對她說︰「劇場係傳遞愛嘅地方。」Gao說︰「佢做導師嘅時候，已經share咗好多關於戲劇嘅嘢，又同我哋做咗好多drama嘅exercise，有啲可能係發掘內心嘅嘢，可能應用喺唔同表演上面，都會用得到，亦因為阿祖嘅關係，令我對舞台劇產生興趣，之後真係睇多咗舞台劇，以前自己比較『毒』，冇乜興趣，一係喺屋企，唔係就係跳舞，因為阿祖，我覺得佢好似一個鎖匙咁，幫我打開咗另一度門，打開另一個眼界。」
入行三年，問Gao怎樣形容這段日子？她說︰「幸運囉，因為好感恩，我哋由一個團隊去起步，有時候如果自己一個人去開始一件事，總會有一種戰戰兢兢同不安，但我哋係由一個團隊去出發，大家陪住大家囉，大家都有不安嘅時候，互相去幫吓，大家撐住，心靈上又好，任何嘢上面都好，我覺得我哋幸運嘅位係，其實我哋已經比好多人多咗好多機會，入行後都見到有啲人可能好有talent，某個範疇好叻，又或者已經做咗啲好好作品，但係都未必有人睇到，或者真係要磨練好長一段時間，先至有少少成果。對歌手來講，有啲可能做咗歌手十年，先可以去開自己第一個演唱會，佢哋都一樣咁努力，咁有passion，其實我哋已經好幸運！得多定失多？一定係得到多，就好似我，其實我嘅起步點，已經得到一班人喺身邊，姑勿論係我哋七個女仔，其實背後仲有一大班人，唔單單COLLAR七個人！點為之失去呢？我冇乜特別諗到啲咩我失去咗，因為我會覺得，如果我timeline裏面未遇到嗰件事，只係我未遇到啫，就唔係叫失去咗，所以，time by time一路去做嘅時候，其實一定係得多過失！」
隊員穩定返我自己的心
COLLAR出道短短三年，已經舉行了三次演唱會，她們每次都會騷後檢討，「我哋完咗演唱會即晚就已經檢討，大家都會分享吓感受，我覺得今次好明顯見到大家都成長咗，每個階段都有唔同成長，但今次呢個騷，可以話係一個少少高壓狀態發生，見到大家都處理自己嗰part之餘，亦好用心去溝通，然後大家都想做到一啲大家喜歡嘅東西，呢個情況下，係一定會有進步，心態上，七個人都成熟咗好多。」
今年，MIRROR宣布不出席《叱咤頒獎禮》，COLLAR被看好有機會問鼎組合金獎。
經歷成員退團、公司人事變動，作為隊長，如何穩定軍心？「其實喺COLLAR做隊長，係唔辛苦嘅！可能大家成日會聽到，話『多謝你撐住COLLAR』、『帶領COLLAR』乜乜乜，首先我唔會去諗自己有冇做呢樣嘢，因為其實我哋都係好自然去make一個team，而唔係覺得我帶住大家去做，應該話有好多人帶住我哋行，even我哋自己七個人入面，我都冇覺得有好明確有一個leader，因為唔同範疇有唔同leader，搵嘢食，一定係Ivy，傾心事，一定Winka係leader，佢好願意去share自己好多感受，呢啲唔同chemistry，先至會build up到COLLAR！如果要話我做得最多嘅，就係當大家混亂嘅時候，我會整合大家意見，同埋令到大家返回去正體入面，呢個就係我做得最多嘅嘢，算唔算穩定軍心呢？我唔知，可能for佢哋來講，有唔同程度，但for我來講，有時我反而係俾其他人，穩定返我自己嘅心。」
COLLAR出道時，MakerVille行政總裁魯庭暉解釋，女團名稱有兩個意思，分別是衫領和鎖骨，代表女團風格多變，亦是連結腦部和心的部分，希望COLLAR的作品能讓觀眾用腦思考、用心感受，每次表演都能夠「hold your breath」。
談到魯生這位伯樂離職，Gao直言事前已經知道，「有通知過我哋，魯生都係好sincere咁去同我哋溝通，我覺得佢要講，或者佢要share嘅嘢，已經喺within我哋成個core嘅過程中做晒，教咗我哋好多嘢，我亦知道佢想做啲乜，所以，我諗個起步點有佢呢個方向，之後點行落去，就靠我哋自己繼續努力。」
今年，MIRROR宣布不出席《叱咤頒獎禮》，COLLAR被看好有機會問鼎組合金獎，若果成真，COLLAR將是繼二OO五年Twins獲得組合金獎後，相隔二十年，再有女子組合奪得得這個大獎，已轉會華納的魯生，如果在台下的話，應該會十分欣慰。
封面攝影：Matt Yau
協力：Jack Yuen、Gary Chan
花絮攝影：洪志富
形象：Nana Wong
造型協力：Haley Chau
美術設計：Sammy Yeung
化妝：Cathy Zhang@powderclub_hk
髮型：Crystal Chan
服飾：Demo、Isabel Marant、Issey Miyake、Sandro、Sheer、Swarovski
