無綫台慶劇《新聞女王2》本周一（15日）迎來大結局，佘詩曼打破續集魔咒，再次帶動追劇氣氛，結局周跨平台直播收視最高21.4點（138萬觀眾），盤踞收視榜首位，再次證明這位三屆視后在港劇的魅力。
近年韓劇、日劇、陸劇和泰劇都打出一遍天，曾經站在亞洲前線的港劇卻落後，到底發生甚麼事？有危就有機，阿佘認為已過了最難行的樽頸位，現在是「爬返起身」的時候，就算面對「AI巨輪」，影視界仍要創新自救才不會被淘汰。
阿佘說︰「有一場戲我未開拍已經好期待，係Kingston Koo(黃宗澤飾)當場揭穿我同夏文汐係兩母女，我自己睇劇本嘅時候都喺度諗，點樣演嗰場戲？其實都幾複雜，首先我內心其實係好崇拜我嘅養母啦，佢係我人生嘅『標桿』，但係喺一個咁盛大嘅場合，被一個外來人揭穿我哋咁多年嘅秘密，我點樣去控制自己嘅情緒，或者我嘅憤怒，又或者我嘅驚慌，同埋我哋母女夾唔夾都好關鍵，點知拍那刻同Pat姐拎轉頭嗰吓，大家都覺得呢個shot中咗，好有代表性，因為現場有攝影師，佢都曬咗一張寶麗來俾我哋，我睇張相都覺得呢段戲出街應該幾震撼。」
演AI仲難過演真人呀
由公司內部鬥爭，轉到業界競爭，《新聞女王2》多宗新聞故事也取材自真人真事，甚至有備受全球爭議的AI發展；世界首名人工智能（AI）生成的演員Tilly Norwood數個月前正式亮相，引發荷李活不少風波，對於AI對演員未來發展的影響，阿佘說︰「AI係一個好偉大嘅發明，亦都幫助到好多嘢，但亦都有某程度嘅傷害，講真，某程度上嘅取代一定有，但係大家要識得運用，我覺得因為AI係冇判斷能力，始終都係需要人類去駕馭，或者係控制點樣用，所以用家真係要有一個好正確嘅態度去處理呢件事，如果唔係就好容易出事，或者係偏離軌跡，對演員，我諗就唔會有好大嘅影響，咁當然你話全AI演員製作，點都會吸納到一班觀眾，但我覺得所有嘢都係一個cycle，可能呢段時間會流行咁玩，但其實我唔相信有溫度嘅人類，會長期鍾意冇溫度嘅作品，因為你feel唔到有血有肉嘅深度同體溫，又或者AI唔會分享到佢生活嘅經驗，因為佢冇任何經歷，其實電視劇又好、或者係電影又好，都係想反映生活上出現嘅一啲問題，或者曾經遭遇過嘅經驗，但AI係唔識問問題、亦都冇咁嘅experience，咁點分享呢？」
有一場戲阿佘要反轉演繹「AI主播文慧心」，但出來的效果觀眾竟以假亂真，「《新聞女王2》都有AI嘅製作，Man姐喺海邊報道嗰場戲係AI，但其實佢都要首先read我啲數據，我亦都要先做一次俾佢睇，先至做到呢一幕；但我同AI梁景仁嗰場係我自己演AI主播，我都練咗一陣，眨眼要好似有規律、拎頭又硬少少，演AI仲難過演真人呀！」
無論AI與Man姐，今次阿佘坦言花盡心思，她想表達Man姐更多內心一面，比第一輯更多情緒演繹，阿佘說︰「無論有幾叻有幾強，就算個個都認為你係最勁，咁其實內心世界點都會有啲，可能係陰影、可能係恐懼，又可能係一啲秘密，當佢離開咗佢嘅大台，有人撐腰嘅地方，以前係嗰啲叫咩要風得風啦，突然要出去開一個新嘅平台叫做創業嘅時候，就算佢幾叻都會遇到困難，佢都會遇到好多問題挫折，但係點樣喺呢一啲問題挫折挑戰嘅環境下，都要屹立不倒，不斷咁諗辦法去繼續努力，向住你嘅目標進發，呢一樣嘢都係我哋想show畀觀眾睇，同埋希望可以鼓勵到一啲出嚟創業嘅人。」
問阿佘，在Man姐身上有沒有看到自己當年離開無綫的影子，「真係有，當時我自己決定行出嚟，其實都有好大嘅勇氣，依家先講吖，我係諗咗兩年時間，因為你唔係話走就走，首先要等合約完咗先，亦都做咗好多風險評估，以最壞嘅打算行呢一步，最壞嘅情況就係冇以前咁多嘢做，因為我以前係一年拍五、六部戲，面對嘅首先可能會減產，又唔知會唔會再遇到一啲咁好嘅劇本，會唔會好似以前咁搵咁多錢？預搵少咗先，始終你離開一個熟悉嘅地方，出到嚟我適唔適應㗎？真係好多嘢要諗，其實外界睇我好似好順，其實一一年出咗去，兩年後我都要再返去拍咗套《使徒行者》，跟住先再出去接到《延禧攻略》，其實呢段時間都有四、五年，只不過中間有套《使徒行者》叫做托一托住，真正打開咗個市場係《延禧》，這五年時間我都幾迷茫，成日都失眠，尤其是啱啱出嚟嗰一年，的確一下子少咗好多工作，冇人搵我，原來大家都唔知點contact我，慢慢知道原因喺邊度咁就解決到。」
阿佘參選九七年香港小姐並得到季軍，翌年簽約無綫，入行至今演出逾六十多部影視作品，無綫幾乎所有小生她都合作過，阿佘最怕就是觀眾看悶看膩，「唔係話冇乜新鮮感，開始我自己覺得好似所有，唔好只話男演員，好多演員我都合作過晒，我自己都覺得觀眾會唔會覺得悶呢？咁如果當我有咁嘅諗法，到觀眾有咁嘅諗法嘅時候，會唔會太遲呢？係呢一下令我開始諗係咪應該轉吓環境？轉吓對手或者拍攝模式，或者係合作夥伴，係咪會有一個chemistry出嚟呢？」
原來阿佘都計漏一位，就是黃宗澤，他們在○六年在古裝劇《覆雨翻雲》只試過一次同場而沒有對戲，「係咪搞笑先？有同一套劇但係冇同一條線，咁其實差唔多冇合作過啦，今次(《新聞女王2》)係第一次合作，其實Bosco都同我預期中嘅感覺相似嘅，我都知道佢係一個會變通嘅人，亦都會喺現場大家brainstorm，會合理同適當地去改對白，其實唔係話劇本寫得唔好，但係當下喺嗰個場景入面，個角色始終係當事人，喺嗰刻會係比較清楚，就算好清楚個劇本，咁我哋喺base on一個好嘅劇本入面二次創作，咁可能會更加適合嗰個氣氛，佢今次都豁出去演，同埋佢有諗過度過嘅，好似嗰場我返新聞部，佢話想要我條獨家片嘅時候，其實係佢要幫方太攞我條片，咁但係佢梗係要面啦，大家都要面，其實我又好想賣俾佢，但呢啲大家都唔會show出嚟，嗰下內心嗰種鬥爭，其實係好好玩嘅嗰場戲，係好有火花。」
服裝︰Max Mara
場地︰香港文華東方酒店