個個都想獨立，唔通個個都可以獨立咩？
近年「獨立歌手」湧現，好像成為香港樂壇大趨勢，不被束縛，自己話晒事，不過有辣有唔辣，成功的話，當然肥水不流別人田；反觀Mike曾比特、Gigi炎明熹這兩位當紅的新生代，卻反傳統與唱片公司簽約，點解呢？
二O一九年，Mike參加ViuTV《全民造星II》，翌年簽約香港環球，一首《我不如》橫掃頒獎禮新人獎，更快人一步打開內地市場，但Mike坦言自己不適合自立門戶，「除咗唱歌，我其他嘢都唔係特別叻！其實滿約後，有諗過唔再做歌手……」不過，回想當年參加選秀節目的初心，Mike很快便打消這個念頭，一路走來，短短六年間披荊斬棘，簽約新公司，他更立下啟德開騷的目標！
出道未夠兩年，Mike便有機會參與內地綜藝節目《聲生不息》，在初舞台翻唱林志美的《初戀》一夜爆紅，面對林子祥、葉蒨文、李克勤、楊千嬅與李健等前輩，Mike被冠以「最大黑馬」，微博粉絲在短短三個月，由數千人衝破百萬人，升幅驚人。
其後Mike再有機會參與大型真人騷《披荊斬棘》，當時出道只有一年多，與一眾前輩級人馬如吳建豪、任賢齊、杜德偉與蘇有朋等進行競賽，被視為越級挑戰。拍攝這個節目時，有指是他與環球分裂的導火線，眼見一眾歌手背後都有一支團隊支援，當時他的唱片公司卻只派上一名助理，中途更被撤走，導致Mike需要自己與節目組交涉，連宣傳片都要親自製作。
自己潑自己冷水
對於這些傳聞，Mike選擇在加盟英皇第一首新歌一次過解說，「新歌叫做《雪出個未來》，係一個新嘗試、新風格，一個新體驗，含意呢……應該話係自己一個感受，呢幾年嘅少少感受囉，綜合返一路以來經歷又好、工作又好，又去過唔同地方闖蕩，總有時被潑冷水，尤其是公眾人物更加經常要面對，更多唔同人講嘅說話，所以我覺得一樣嘢，如果你鍾意一件事，就要去做好佢，我希望將呢一個感受同message，擺喺我第一首歌上面。」
新歌的MV，Mike希望讓大家看到另一面的「曾比特」，「好colorful、好繽紛，好想快啲俾歌迷睇到，所以拍攝MV當日早上趕返香港，前一日開緊工，晨早返嚟拍咗十三個鐘，今次同之前大家認識嘅曾比特，有少少唔同，以前大家見到嘅曾比特，比較沉實，今次係好繽紛好開心！」
講到潑冷水，Mike笑言自己都有份潑自己冷水，尤其溝通，是他最不擅長的，「好似啱啱影完相，覺得自己影得好差，自己潑自己冷水！我覺得工作上面，我溝通唔係特別叻，大家有時都有好多嘢誤解，或者唔知你想表達啲乜，呢樣嘢對我嚟講，真係一種學習，無論工作上或同事之間，我覺得溝通真係好緊要，呢個亦都係我一路想做到嘅嘢，但有時未必咁容易，同時要同唔同單位溝通，其實都係一個考驗囉，所以無論之前嘅經歷又好，新歌想提醒自己多啲，無論有咩經歷都好，最緊要堅持想做嘅嘢！」
他坦承以往與公司的確有溝通問題，「我覺得係嘅，唔好話係一個問題，我覺得係好多嘢，有時未必係我識得好好地去表達，可能大家溝通出錯，好多障礙，伸延咗好多嘢！以前大家睇好多資訊、好多報道、新聞呀，講真，有時大家仲快過我知，anyways我覺得最緊要互相建立信任，無論之後團隊也好、公司也好，我最在乎呢樣嘢！」
有啲攰又有一種擔憂
Mike是近年能夠成功打入內地市場的新生代歌手，問他為甚麼不自立門戶？他說︰「獨立又好、簽公司又好，唔可以話係冒險，但要有一個planning，或者一個方向適合自己。簽大公司有好處壞處，獨立自己做亦有好處壞處，for我自己呢，我覺得我除咗唱歌之外，其他嘢都唔係特別叻，其實都需要好多人去幫手，話返俾我知，究竟咩係好、咩係唔好？咩係啱、咩係唔啱？我自己想focus唱歌和幕前演出，好多後面呢一堆嘢，要交返俾好多犀利嘅人去處理。我知道我未必可以走到去獨立嘅材料，其實最初，我諗上一份contract完咗之後，我自己其實都思考緊，下一步應該點？簽唔簽公司？自己走出嚟做？更加有諗過，不如唔再做歌手嘅！」
幸好最後改變決定，「坦白講，因為有啲攰，又會有一種擔憂，我算係一個比較胡思亂想嘅人，好多嘢浮現喺腦海，所以會擔心。如果之後繼續做歌手，會唔會愈做愈差呢？可能我要花好多時間同工夫，先可以獲得認同，擔心之後未必獲得好似以前咁，會有少少陰影啦，定係唔做好呢？諗諗吓，唔得喎，如果真係唔做，對唔住呢幾年努力，再諗返當年點解參加《造星》，好快就決定ban咗呢個諗法。」
回想入行的初心，Mike說：「因為想做歌手囉，我仲記得嗰陣報名諗咗好耐，諗咗一個鐘，去到最後唔好諗喇，撳掣啦，我先真係報名參加！如果真係唔做，連嗰一下團火都浪費咗，真係唔得，唔係好對得住自己，咁辛苦做到個歌手，我覺得會後悔，所以堅持，只不過喺選擇上面，自己究竟屬於適合做獨立歌手，定係同公司合作？我都掙扎咗一段時間，喺一個緣份底下，認識咗Mani（霍汶希），大家理念又OK，我就覺得let’s go啦！」
Mike與Mani的緣份，其實早在參加《造星II》開始，當時Mani擔任決賽評審，Mike笑說︰「當時比賽好緊張，同埋我諗佢唔係好認得我，我個身材比較肥，跟住個頭又……唔係嗰回事，之後我哋喺一個晚會上再見面，跟住佢話英皇好欣賞我，俾咗好多意見我，叫我唔好淨係唱cover，其實最緊要大家工作理念、音樂理念一致。我好想去嘗試唔同類型音樂，我覺得最緊要呢兩樣嘢，喺溝通上面，佢俾咗好大信心我，一條team齊上齊落。」
由合約完到簽新公司，Mike坦言只有短短四個月時間，「所以好多時，我覺得有啲位真係緣份，有時你好努力去尋找一樣嘢，雖然未必即時見到，但你要有呢個心，突然間一個moment就會出現，其實四個月時間都真係好快。」
花絮攝影：洪志富
形象︰Winnie Hu
化妝：@justingtang.makeup、Yannes Lee@NDNCO.co
髮型：DennisTsui@Artifylab
服飾：Aenrmous、Aepel、COS、Demo、Pedro、Sandro、Shanghai Tang、Swarovski