楊千嬅一九九五年參加新秀入行，同屆有Eason陳奕迅，兩人在華星年代同樣出產過不少好歌，Eason剛剛亦完成世巡，千嬅更特別到澳門欣賞尾場，她說：「嘩，好多回憶，仲記得佢喺隔離拎咗金獎嘅畫面，佢唱歌真係好有感覺，一首歌唱咁多次，每次都仲可以有新唱法，我現場聽真係好感動。我有去睇佢香港第一站，中間其實都想再去睇，但就撞正自己巡演，嗰日亦都唔知點解，突然諗起佢，咦？佢依家點呢？於是就同個仔去咗澳門睇，同佢打氣，嗰場係倒數第二場，坐喺台下望住佢，好像回到從前，呢場表演其實就係佢嘅故事，然後我都開始回想自己，大家起點都一樣，雖然往後大家有不同的經歷，但音樂卻能把大家連結起來，三十年一晃就過去，我哋平日都唔係經常聯絡，見面都好少，疫情後我又喺上海，差唔多有六、七年冇見，偶爾會傳個信息，有時喺網上睇到佢演唱會啲片，聽到佢唱某啲歌，其實有時啲歌詞好似救咗我一命，所以我現場聽嗰陣，真係好感動！」
Eason的女兒陳康堤（Constance）最近亦加入樂壇，千嬅說Constance小時候見過一次，大讚她有型，唱歌有風格，「佢好有型，我有聽佢第一首歌，其實都幾難唱，首歌不止考驗音準，仲要唱出一種態度，新人要把態度和風格都表現出來都幾難，但佢有自信又有熱誠，細個嗰陣見過佢一次，依家真係出道做歌手，以前係佢阿爸追夢，對音樂充滿熱愛，然後就輪到佢個女，呢一幕幾感動。」
追星也很需要勇氣
楊千嬅與丁子高今年結婚十六周年，今年他們在家中靜靜度過，「之前話身體有啲問題要搞搞，可能都係多年來造成的勞損，其實又唔係甚麼大問題，只係有啲原因搞到有啲貧血，貧血係幾煩，依家已經正常返，但都要休息下，等身體慢慢好，所以最近好少見到我出去玩，嗰日都冇特別慶祝，因為之前除咗睇Eason，又去咗睇G-DRAGON，真係好攰！我問佢（丁子高）等陣仲食唔食飯？佢話唔食啦，心諗周年紀念都唔食？原來佢扮唔記得，拎啲電話出嚟訂位，聽日仲有位都唔慌好食啦，我話唔好搞咁多，你想食咩，我去煮啦，佢話想食壽喜燒加燒蝦，壽喜燒定鐵板燒呢？鐵板燒要出去食喎，最後呢，我咃係打邊爐，三個人食得啲乜？結果全公司同事連埋演唱會主辦，全部嚟咗我屋企，其實咁多年仲驚乜喜呢？大家一齊食餐飯就好開心。」
訪問最後，要千嬅問自己五個問題，她想了一想，其中一個問題令她爆喊，「咦，我上一次喊係幾時？係前日中午，喺屋企執嘢，幫個仔執房嘅時候，睇到佢寫一張紙，應該係學校啲功課，嗰陣佢大概四、五年級，差不多七歲，發現原來個仔要寫咁多作業，有一張上面寫着To Mommy，仲係啲小朋友字跡，畫咗三個女人，仲有一道彩虹、一片草地，佢性格好隨性，大概都知道他想表達啲乜，就是外婆、嫲嫲、仲有媽媽，結果一看到，我就哭了，其實係幾無聊，但又唔知點解會咁感動！」
另一條問題，千嬅則問自己有甚麼想同歌迷講？「我真係好感激佢哋，追星其實也很需要勇氣，真㗎，其實我好清楚，因為自己係被追嗰個，當然有責任又有壓力，紅唔紅都未必講得準，人有三衰六旺，不過我真係好多謝佢哋，有啲人真係頂硬上幫我，仲有啲會陪我出街，無啦啦同人鬧交，仲有我啲fans其實文筆都幾好，創作力真係勁，雖然字眼唔太文雅，多謝佢哋，大家都係烈女！」足本影片留意明周娛樂YouTube！
花絮攝影：洪志富
形象：Tung Kam、Haley Chau
化妝：Ling Chan
髮型：Heitai Cheung、Taurus Lee
服飾：Buerlangma、Max Mara、Victor Chan Studio