現年三十九歲的「細細粒」陳嘉佳，由二三年八月開始減肥，經過一年零八個月，五月二十九日踏入四十歲的她，終於穿上真正的泳衣拍下成果。
這趟減肥之旅，「細細粒」受到大家重新關注，然而，減肥後的她並沒有變了模特兒身材，但徹徹底底重拾健康和自信，並希望大家記起她的演員身份，發掘她更多的可塑性，四十歲，準備重啟第二人生。
三個月前搜羅泳衣
去年二月，細細粒穿上一件頭的游泳衣，在住所的泳池為本刊拍照，當時她已經下定決心，要穿上一件真真正正的泳衣；拍攝前，細細粒早三個月前已開始搜羅各式泳衣，最終選定三套，她解釋︰「大個女啦，點解我要喺四十歲影泳衣？仲要《明周》先肯影呢？因為信得過《明周》會影得我靚，哈哈！同埋講真嘅，我由細到大都係肥，真係冇諗過可以有一日著泳衣見人，我希望大家唔係用嘲笑嘅角度去睇呢輯相，終於去到四十歲，算係第二人生，應該要放膽去試下。」
至於細細粒的健康指數，她說︰「年初做晒簡單嘅body check，驗血嗰啲就全部正常，照嗰啲就未做，當日話我再唔減肥得返十年命嘅醫生，其實係我嘅家庭醫生，連佢都問返我，究竟用咩方法可以咁快？佢有少少唔係好相信，因為我由好唔健康去到健康，其實只係用咗半年時間，過肥嘅病例最多都係減磅，點解連內臟脂肪呢啲都可以搞掂？仲要我係唔做運動，係全靠飲食，你問我辛唔辛苦？我嘅辛苦係在於由細肥到大，一開始唔知道要用乜嘢方法去減，研究咗好多方法，其實所有人減肥都係會面對，不外乎嗰幾種方法，但用乜嘢方法先係啱呢？網上嗰啲咩明星餐單減肥法、咩青瓜雞蛋唔食飯唔飲水斷食斷餐法，我乜都試過，呢啲都肯定會反彈，我覺得要用最簡單三步曲，呢三樣嘢都唔使錢，每日飲水飲夠二千到二千五百毫升，呢個係一定要嘅；第二，每日瞓覺要瞓足七個鐘；第三，戒糖，係白砂糖，見到呢三個字就拜拜，同埋每個人都要知自己點解會肥？究竟你食得太多而肥？因為工作壓力？你要知道自己點解先，我就知道我係大食症。」
拍攝花絮圖輯︰
攝影協力︰Yung
花絮攝影︰洪志富
化妝︰Circle Cheung @ndnco.co
髮型︰Evan Yim @two two
