完成大型世界巡演《My Tree of Live》後，楊千嬅終於返回香港舞台——紅館。
於今年一月世巡的廣州尾站，千嬅竟然把整個歌單reversed，把毀滅後重新拼湊生命之樹的過程，變成火鳥在浴火重生！reversed rundown寓意生命循環，結束也是開始，即將舉行的紅館騷，千嬅只把世巡火鳥的白色羽毛在海報中重現，其他都是為香港歌迷重新安排，還有一個前所未有的紅館舞台設計。
他鄉遇故知，在其他地方開騷看到香港歌迷，千嬅會特別感動，所以這場紅館騷，她都是為歌迷而設，「我真係好感激佢哋嘅勇氣，追星其實都好需要勇氣，我好清楚，因為自己係被追嗰個，大家都係烈女！」千嬅三十年，由紅館再出發，她說，一切都是最好的安排。
完成五十三場《My Tree of Live》世巡後，千嬅在最後一場完騷後的慶功宴，邀請所有台前幕後狂歡，在慶功宴上千嬅特別感觸，她說︰「其實做完《My Beautiful Live》(一九年展開的世巡，期後因疫情而取消）之後，嗰一刻有諗過真係要退落嚟做返媽媽，又遭遇到一啲人生經歷和歷練，可能個天覺得我仲有嘢未做完，要我繼續，於是又用了五年籌備這個tour，發現咗自己仲有好多空間，仲可以繼續。」
千嬅直言今次紅館的檔期得來不易，「我記得今年一月中完成巡演啦，本來諗住完咗之後休息下，因為身體有啲小問題，又想陪下屋企人，打算錄埋張唱片，休息九個月至一年左右！嗰日慶功宴飲到醉晒，大家喊到好似有今生冇來世咁，因為大家由第一日做到尾，差唔多兩年時間，真係唔知會唔會再見？去到三、四月，突然話紅館有期，因為十一月這個檔期，其實係有人退出，主辦都未問，我就申請了，佢哋都知我想做嘛，呢件事真係好夢幻，可能之前試咗咁多次都攞唔到，不過我又唔覺得係壞事，一切是最好的安排，依家回頭睇，呢個時機都幾好，十一月係Thanksgiving（感恩節）嘛！」
揀十次我都會揀紅館
她繼說：「我記得收到紅館有期那一刻，我身邊班同事仲感動，我仲未來得及消化，因為個仔返嚟香港讀書好多嘢要搞，一時間打亂晒個計劃，但都冇辦法，大家都決定做，但有一樣嘢，我自己就好似好鎮定，點解呢？因為我哋去到每一站、每一場，都會諗起一啲歌，大家成日話，呢首返香港要再唱一次，但都只係講講下，但個rundown同個騷入面內容，原來不經不覺已經出現咗，直到真係開始通知大家，我哋真係開show喇，大家個心情真係好驚喜！」
每次踏上紅館，千嬅說，感受都很深很深，「我自己當然好開心，其實我中間都上過紅館做過幾次嘉賓，每次感覺都很深，老實講，又有點傷感，感覺熟悉又陌生，但只有紅館先有嗰種情懷，期間主辦方一直叫我換去其他場地，問我點解要咁固執？香港有咁多新場地，仲有大型體育場，今次世巡都開過好多次體育場，覺得我都已經準備，經驗都好豐富啦，但我都唔知點解，你叫我揀十次，我都會揀紅館，唔關人數事、唔關場數事，因為紅館對我嚟講，係我音樂路上一個里程碑，就算俾一個更大場地我，都做唔到嗰種凝聚力！今次真係為香港而設，係一個全新演出，廣州尾場唱《火鳥》時，嗰條白色羽毛掉下來，依家回到演唱會poster，終於可以回來了！」
楊千嬅的香港故事，由廣東歌、港產片甚至港劇都有出現，她把世巡的歌單全揀廣東歌，又成功激活了不少歌曲，「其實我有啲歌比較冷門，但我依家都分唔到，因為做完今次巡演之後，好多我以為冷門嘅歌，原來大家都識唱，因為依家係社交媒體年代，大家隨時都可以搵返嚟聽。我喺唱片公司長大，成日覺得要第一主打、第二、第三主打先算hit，原來如果我係普通歌迷，買碟都唔會理佢咩主打，鍾意聽咩歌就聽咩歌，有幾首我真係好意外，《寒舍》、《河童》、《稀客》喺巡演中段開始hit返，有啲歌我甚至冇唱過live，《偷生》真係最癲，嗰陣時靜靜雞錄咗，都唔記得擺咗幾耐，唱片公司每年都要還歌數，你點估到呢首歌，可以去到咁北？大家都識唱！」
有些東西要從人生減去
今次紅館的歌單，千嬅講到明有一半都不是當年的主打歌，「今次我會全程由自己主導，老實講有一半唔算係主打歌，依家再唱返這些歌，每一首感覺都同以前唔同，可能係我對歌詞嘅體會，或者自己人生走過嘅種種經歷，先發現呢幾年，我最感激係將所有歌詞走過一遍，有些歌，真的發生過。我覺得依家呢個階段，我有很多話想講，我亦唔確定下次仲會唔會有呢個機會去做，畢竟人已經咁大，我呢一刻想同大家分享，楊千嬅從這個起點再出發，當我再望向未來係會抱着一個咩心情呢？我做咗呢個行業三十年，有時候覺得長、有時又覺得短，在這場音樂人生中，其實我真係領悟好多、收穫好多！從一開始只想不斷增加，到現在開始懂得，有些東西要從人生中減去，這個過程，我一直在認識自己，我希望大家睇完個騷，可以鼓勵到自己。」
問到千嬅今次紅館的舞台，她只肯透露三面台，但有四面台的感覺，「導演仲誇張，年半前已經諗到個台點玩，呢個設計大家一睇已經好有感覺，當時就更加期待返香港演出，係一個三面台，但感覺就似四面台，我唔知點同你解釋，因為唔可以咁早穿（橋），總之今次，唔單止係回顧嘅紀念演唱會啦！」
花絮攝影：洪志富
形象：Tung Kam、Haley Chau
化妝：Ling Chan
髮型：Heitai Cheung、Taurus Lee
服飾：Buerlangma、Max Mara、Victor Chan Studio