姚焯菲（chantel）、張蔓莎、張蔓姿、胡子彤等今日出席新城廣播劇《成長告訴我們的二三事》記者會，首次聲演廣播劇的chantel表示比想像中難，「因為觀眾睇唔到畫面，要靠聲線演繹故仔，加上角色比較慘，同我現實中唔一樣，都需要時間拿掐。至於咬字方面雖然唔可以話完美，但我都好努力去咬正每一粒字，如果過到自己嗰關都應該算ok。」她表示屋企人未有阻止她拍拖，反而自己未準備，「屋企人都俾拍拖，但係我自己唔俾，因為太多嘢做，而且暫時無追求者，都要好講緣份，如果呢個時間嚟搵我就真係無緣份，因為我每日工作時間都好忙，完全無時間。」另外母親節將至，她表示會與媽咪及婆婆食飯慶祝，更會準備禮物給她們驚喜。
廣播劇中胡子彤與三女有感情線，問到他會否擔心有代溝時，「唔會有代溝，我依家做嘢唔會問生肖，暫時大家話題都搭到嘴，但如果真係唔明都會問囉。不過因為我入行前係做教練，所以同啲小朋友都好易混熟，應該問題不大，嚟緊做嘢都同後生一輩一個生肖，不過大一輪，所以唔一定分得咁細。」
