出道未夠兩年，Mike曾比特便有機會參與內地綜藝節目《聲生不息》，在初舞台翻唱林志美的《初戀》一夜爆紅，面對林子祥、葉蒨文、李克勤、楊千嬅與李健等前輩，Mike被冠以「最大黑馬」，微博粉絲在短短三個月，由數千人衝破百萬人，升幅驚人。
其後Mike再有機會參與大型真人騷《披荊斬棘》，當時出道只有一年多，與一眾前輩級人馬如吳建豪、任賢齊、杜德偉與蘇有朋等進行競賽，被視為越級挑戰。拍攝這個節目時，有指是他與環球分裂的導火線，眼見一眾歌手背後都有一支團隊支援，當時他的唱片公司卻只派上一名助理，中途更被撤走，導致Mike需要自己與節目組交涉，連宣傳片都要親自製作。
自己潑自己冷水
對於這些傳聞，Mike選擇在加盟英皇第一首新歌一次過解說，「新歌叫做《雪出個未來》，係一個新嘗試、新風格，一個新體驗，含意呢……應該話係自己一個感受，呢幾年嘅少少感受囉，綜合返一路以來經歷又好、工作又好，又去過唔同地方闖蕩，總有時被潑冷水，尤其是公眾人物更加經常要面對，更多唔同人講嘅說話，所以我覺得一樣嘢，如果你鍾意一件事，就要去做好佢，我希望將呢一個感受同message，擺喺我第一首歌上面。」
新歌的MV，Mike希望讓大家看到另一面的「曾比特」，「好colorful、好繽紛，好想快啲俾歌迷睇到，所以拍攝MV當日早上趕返香港，前一日開緊工，晨早返嚟拍咗十三個鐘，今次同之前大家認識嘅曾比特，有少少唔同，以前大家見到嘅曾比特，比較沉實，今次係好繽紛好開心！」
今年入行第六年，但「曾比特」的歌庫只有十多首歌，算是慢工出細貨的歌手。今次簽約新公司英皇，Mike除了想加快節奏外，亦定下目標，「我會快手啲，其實第二首都錄製當中，我自己希望推出多啲歌之後，就可以同老闆講，可唔可以去啟德？自己好想試啟德個場，我覺得以前大家只有紅館一個目標，依家可以多一個更大目標。開演唱會，我當然想，但都係嗰句，要夠歌先得，冇可能咁多翻唱，大家認識我，可能因為翻唱，我希望今年出多啲自己原創作品。」
爆炸頭是Mike的標誌，隨着轉會而改形象？「其實都討論過這件事，其實我是想轉㗎，因為爆炸頭有少少難打理，出街有少少麻煩，電太多會甩頭髮，之前成日都講，我想將爆炸頭留到六十歲，但我發覺現實生活唔太可行，因為不停電的時候，我浴缸已經塞滿頭髮，最後大家討論完，依家可以唔使電，夾都夾到個呢個效果。」
除了髮型，Mike亦開始走入健身房，一年間減走三十磅，在生日當日騷出爆肌照，「其實我唔係要練得很健碩，因為唱歌都需要一個好強身體，嗰張腹肌咁啱影到啫，因為當時我們拍宣傳照，攝影師就問『你有冇腹肌？』，當時開始做gym好似有少少，咁就影咗張囉！」
以前在舊公司，Mike對感情生活十分低調，不太喜歡談及女友，其實早在二O一七年出道前，Mike已與女友鄧嘉宜開辦唱歌學校，直到正式加入樂壇後，Mike仍繼續當歌唱老師，分享唱歌和舞台經驗給喜歡唱歌的人，也為學員安排公開演出機會實踐學習，回饋新一代。
「一直都繼續運作，我自己之前都有教，最近比較忙就少啲親身教，但之後有時間都希望兩邊都兼顧。我哋拍拖九年喇，好穩定？拍拖本身都是為尋找the only one，所以大家亦都好信任對方，最重要大家認同呢件事，尤其是我剛剛入新公司，需要時間去繼續努力工作，工作先啦，結婚？我啱啱出歌咋，係咪玩嘢呀？哈哈！」
花絮攝影：洪志富
形象︰Winnie Hu
化妝：@justingtang.makeup、Yannes Lee@NDNCO.co
髮型：DennisTsui@Artifylab
服飾：Aenrmous、Aepel、COS、Demo、Pedro、Sandro、Shanghai Tang、Swarovski