今年泳兒（Vincy）收到最好的新年禮物，一定是《叱咤》元旦夜獲得女歌手獎，首奪銀獎的她，一上台即爆喊，事隔一個月，泳兒說，依然覺得很夢幻。農曆年難得放長假，去了瑞士度歲，回來後再作戰，畢竟銀獎不是終點。近來最常被人問及的，是同公司加入了Gin Lee（李幸倪），怕不怕被分薄資源，泳兒笑說：「好似有好多人擔心我……我覺得大家唔好咁負面！」還有被連登仔揭發是「深井小燈籠」同網民玩點唱，泳兒說：「如果大家覺得係，咪係囉！」她不否認是連登絲打，更會mon實留言！
40歲的泳兒入行17年，今年終在《叱咤》首奪女歌手銀獎，賽前已經是網民熱門的她，上台領獎時激動得爆喊，「我用咗17年終於攞到……無論你做緊咩工作都要堅持，每一個人都有能力創造奇蹟！」相隔一個月，泳兒說：「其實件事都好夢幻。我入行17年，中途有一段期間，女歌手呢個獎項，我覺得好似冇乜可能，旨在參與下，冇諗到2023年可以首奪女歌手獎，可能之前唔係一個好時機，自己都未可以拎得起呢個獎。」
走過高山低谷，泳兒未變身「暗黑泳兒」前，曾經歷一段迷失期，「迷失係搵唔到自己identity，覺得變咗一份工去做，為生存而去做，而唔係為自己夢想；穩穩陣陣，過咗去就算，我諗係當時最搵唔返自己靈魂喺邊度。」一度想過離開樂壇轉行，「我直情有諗過離開唔再唱歌，覺得搵唔到方向，不如試下謀其他行業，set up自己小生意，中間我都試過同朋友搞下首飾，我又好想開寵物美容，去學過寵物護理，又去學香薰治療；但係我覺得唱歌始終都係自己最鍾意，反而唔係諗完全唔唱，可能諗做一個Slasher（斜槓族）囉！」
「暗黑泳兒」成就了泳兒的身份認同，更獲樂迷和網民認證。拿得「女銀」後，泳兒即被連登仔揭發，四年前已經化名「深井小燈籠」上連登，同網民玩「你點我唱」在討論區清唱；《叱咤》攞完獎後竟然再「上水」，「深井小燈籠」對網民有求必應，清唱了Jeremy（李駿傑）的《半》、神曲《First Love》、MC張天賦《小心地滑》，還有泳兒的《葉落冰川》和《黛玉笑了》等歌曲。
好享受睇網民留言
「深井小燈籠」真身，泳兒的說法是，「我對呢件事覺得，係唔係都不是一個重點，我覺得每個人都有好多內在情感想抒發，透過唔同渠道，唔使去尋求一個好確實答案，如果大家覺得係，咪係囉；唔係就唔係！」把聲似到咁，冇可能不是吧！泳兒就叫網民，「我覺得要相信自己嘅直覺、相信自己嘅聽覺，哈哈！」
對網民有求必應，泳兒話自己都算是連登絲打，「我好多forum都睇㗎，因為我覺得唔可以活喺自己世界，因為有時候一啲好疼愛你嘅人、好錫你嘅人，佢哋未必會同你講好真嘅說話，會驚hurt到你；我覺得forum裏面，大家都冇見過大家，佢要去批評你，佢可以好狠，佢鍾意你，亦都可以好盲目。我好enjoy去睇，當然呢幾年，都會培養一個強大心智，去面對所有comment，因為有啲真係好harsh！」有幾harsh同幾hurt？「有啲人會話，你唱極都係咁㗎啦，咁多年你仲未有咩成績，你自己反省一下啦！每次當我出一隻比較破格啲嘅歌，有啲人會話，今次佢已經去盡咗，我就會有一個心態，你又知？其實佢都有啲激發到我自己，嗰種倔強性格！」
入行17年，泳兒在歌曲上勇於挑戰創新，對公司反而從一而終多年來都在英皇，最近公司新簽了Gin Lee（李幸倪），泳兒說不約而同有很多人都問她擔心擔心，她淡定的說：「我相信公司都會希望每一個artist好。資源呢樣嘢，我覺得會公平分配，好似有好多人擔心我咁樣，我覺得首先，我相信公司會公平分配，第二，我覺得呢啲嘢冇得去擔心，最緊要做好自己音樂呀，邊個加入，我覺得唔影響我點樣做歌，反而加入一啲新朋友，可能有啲衝擊，我覺得大家唔好咁負面！」
在泳兒身邊敢對她說真話的，當然還有拍拖11年的髮型師男友Ziv，「下一步係咪結婚，真係未諗，我覺得能夠搵到一個可以互相扶持、互相成長嘅伴侶，呢個moment我覺得足夠。呢三年疫情令到大家事業，有唔同方面打擊，結婚唔係一件好迫切要做嘅事情。佢係嗰啲會同我講真話嘅人，因為愛，先會講出真說話。我哋兩個都唔係肉麻嘅人，我覺得陪伴好緊要，我哋又唔係啱啱熱戀，我覺得穩定嘅關係，可以各自發展自己事業，然後互相幫到大家成長，先最緊要！」下一步，未必是結婚，但女金和唱到紅館，指日可待。
化妝：Melody Chiu
髮型：Zivyeunghair@leonardo3
場地提供：Mustard Seed
