TWINS SPIRIT演唱會昨晚（23日）完成第三場，雖然天氣凍到得幾度，但無減觀眾熱情，TWINS在台上也答謝大家：「你哋啲熱情喺咁凍天氣下，俾到我哋全晚力量！好勁呀！」
TWINS不單止搞「笑」觀眾，亦同時搞「喊」大家，唱《相愛22年》互訴心聲時，阿Sa向阿嬌說：「親愛嘅鍾欣潼女士，多謝你22年來成為我拍檔！我人生最大成就，就係同你成為組合！呢個江山係我哋打番嚟！而無論開心或低潮你都對我不離不棄，陪住我，出面好多人覺得我好醒，其實唔係㗎，我內裏唔係一個非常自信嘅人，好多時你同我一齊，我多咗好多力量。」阿嬌則說，「認識你22年，我真係冇諗過我地可以走咁遠，開始個陣，出面好多質疑嘅聲音，話我哋好快就冇㗎啦，但我哋係逆境更齊心，更同心對抗出面，多謝你冇放棄我，我亦冇放棄自己。」
去到握手環節，阿Sa兩晚握到第三首歌完了，還未握完四面觀眾，又經常搞笑大叫：「哎吔，我未握晒呀，我好慢呀。」安歌唱《丟架》時，阿Sa突然大叫停，原來是她一開口唱就咬到自己條脷，要重新唱過，旁邊的阿嬌狂笑說：「冇嘢嘛？」阿Sa除了狂笑又不停反問：「喂呀！點解次次都發生我身上㗎，冇理由，我食得咁清，唔會熱氣㗎！我地抹走佢重頭來過！」而阿嬌就笑住說：「係抹唔走㗎！」順利完成三晚演出，TWINS終於可以休息一日，25號再開騷，兩人異口同聲說，「YEAH！終於三場完成，可以放假。好想食宵夜，好餓，可能係今晚觀眾太熱情，全部都唔鐘意坐低，成晚都企晒起身跳舞，我哋都用多咗好多能量。」