《TWINS SPIRIT演唱會》昨晚（3日）來到第11場，蔡卓妍（阿Sa）、鍾欣潼（阿嬌）愈唱愈強，昨晚是歌迷場，兩人更特別為歌迷安歌多4首歌，又選唱了為歌迷而寫的新歌《忠粉》 ，唱時更因為歌迷的熱情讓他們未開口唱已經落淚。
阿Sa在台上表示：「今晚係fans場！真係未開騷係樓下已聽你哋嗌啲聲，太犀利啦！」她稱組合走來22年不容易，最感謝歌迷一直好壞日子都陪伴到底，讓她們可以行下去後，「今晚我想唱一隻歌，係一首新歌，呢首歌係紀錄左係最新專輯裏面，兩個字嘅，送比所有嘅歌迷 ，呢首歌《忠粉》….哎也…. 未唱已經想喊……」兩人唱完這首新歌後即淚流滿面，均不約而同表示 : 「 太感動啦！真係。要平靜下先….」
平靜過後，兩個打扮如公主般的TWINS，又變回平日瘋癲模樣，突然唱「冇咗你哋我哋會死！ABCDEFG FANS FANS 我哋支持你！」讓現場陪她們哭中的歌迷又忽然開心笑爆，阿Sa道：「 我哋不嬲係咁，想唔想像到呢22 年，我哋都係咁？哈哈哈…..」現場歌迷狂叫「嘴佢、嘴佢」，阿Sa笑說：「你哋真係有咩咁特別？又唔係未見過？成日都做㗎啦！」 敵不過現場萬人大叫「嘴」，兩人就搞笑跳出像打功夫一樣舞步，阿Sa拉阿嬌過來嘴，但第一下竟然係失手相撞，笑爆全場，第二次再真係完美嘴到，歌迷叫聲亦嗌裂整個紅館。阿嬌嘴完之後就笑道：「真係無聊呀你哋！見係fans場滿足下你哋啦。」
萬人K歌大合唱經典歌後，每晚給予觀眾評分的阿嬌，就打出500分！阿Sa說，「 今晚係咪唔駛訓，我都唔想走啦！點歌啦，安歌到凌晨三點呀！」讓氣紛推上最高潮，歌迷瘋狂點歌，最後他們安歌了五首歌 : 《大浪漫主義，《百試不厭》，《士多啤梨蘋果橙》，《大紫大紅》及《死性不改》，再以《風箏與風》作結，讓歌迷大滿足離去。此外昨晚，何超雲， 何超蓮，及張達明亦有來支持TWINS。
