今日（19日）是天后鄭秀文（Sammi）迎來49歲生日，Sammi向來非常疼錫歌迷，每年生日都會與他們慶祝。今年亦不例外，她昨晚假九展Star Hall舉行迷你音樂會，與近三千位「三米飯團」歌迷預祝生日，兩小時中又唱又跳，有笑有淚，非常盡興。而Sammi 靚相前日隨Spotify EQUAL 活動，登上美國紐約時代廣場大屏幕廣告，非常搶眼。
音樂會以《我們的主題曲》揭開序幕，Sammi說：「咁多年嚟我喺音樂和電影角色都不斷新嘗試，怕悶，想挑戰自己。今次新碟試咗不同音樂風格。」然後與Shimica表演新歌《新造的人》。之後她拖住Shimica說：「本來Shimica 唱一首我嘅歌，但我覺得佢應該喺舞台唱出佢自己嘅歌，佢話好緊張喎……」台下以熱烈歡呼聲和掌聲打氣，Shimica感動地說：「好榮幸可以喺度唱一首自己創作嘅歌《In My Dreams》。」
Sammi表示精心挑選昨晚音樂會的歌單，除了《愛上一個人》、《調情》和《如果你有事》等電影歌曲外，亦首度演唱出爐新碟《Listen to Mi》內新歌，包括冠軍歌《萬物有時》、《新造的人》( feat. Shimica) 和《螢》。而播放《重生的心聲》時，她邀請歌迷合埋雙眼，全場關燈，享受8D效果製作帶來不一樣的音樂之旅。之後台上首播她形容是入行30年以來最喜愛的新歌《無人島》MV，歌迷在大銀幕看到她在MV中全新造型跳現代舞，非常驚喜。
之後生日歌響起，舞台中間轉出坐在粉紅色梳化的Sammi，她捧著生日蛋糕，全場齊聲「生日快樂」。她說：「今年係我最後一年4字頭生日，多謝你哋為我慶祝。望到台下嘅螢光棒，一點一點，你哋就好似螢火蟲咁，一小點一小點咁凝聚對我嘅愛，支持我，愛護我，多謝你哋。」
然後她與全場歌迷大合照，留下美好回憶。壽星女Sammi問台下有沒有歌迷要跟她合唱？歌迷熱情舉手，她揀了一位大隻仔歌迷，但因疫情不能請歌迷上台，她笑言叫歌迷站起來跳舞，結果全場歌迷都站起來熱情歡呼，與Sammi 又唱又跳《獨家試唱》，氣氛高漲。
音樂會亦有感性時刻，Sammi提到爸爸時感觸眼濕濕，她說：「我鍾意唱歌，用歌聲同自己打氣，同身邊嘅人打氣。今日好想唱俾天家嘅爸爸聽，佢以前成日都為我打氣。每次我感到氣餒，想退休嘅時候，爸爸就會為我打氣，鼓勵我。我好想唱呢首歌俾自己和返咗天家嘅爸爸。」然後她唱出陳百強的《喝采》，唱到眼濕濕，背向舞台拭眼淚。
音樂會尾聲，Sammi換上生日音樂會特別版tee，勁歌熱舞《信者得愛》( feat. Shimica)、《Chotto等等》和《煞科》後，歌迷大嗌encore。她笑言自己年紀大好攰，但不敵歌迷熱情，即興加唱《愛的輓歌》和《終身美麗》為迷你音樂會畫上完美句號。完場後，Sammi返入後台立即開薯片慶祝，她說：「終於可以食到朝思暮想嘅薯片，因為呢排保住把聲，終於完騷可以食和休息吓。希望今晚揀嘅歌歌迷都鍾意，因為呢個騷完全唔係紅館演唱會形式，揀嘅歌都幾冷門。多謝歌迷今晚帶俾我難忘嘅生日會，多謝大家祝福！」
