公認為新一代樂壇「實偶派」的MC張天賦，他自評外貌有七分、唱功有八分，最強優勢是nothing to lose，冇嘢輸！
入行短短四年，MC的音樂在市場佔據率很高，由《反對無效》、《小心地滑》到《世一》，首首都有話題性。當歌手們都呻，在香港唱歌搵唔到食，二十七歲的MC已經賺到第一桶金，讓媽咪可以提早退休，亦兌現了簽約唱片公司時的承諾。
MC張天賦擔任張敬軒演唱會嘉賓時，曾被軒公大讚︰「實（力）偶（像）派，唱功好扎實。」對於這個稱號，MC謙虛表示唔敢當，「如果以身高樣貌唱功來計，我認為自己只係合格，並唔係一個好叻嘅『實偶派』，亦希望成為一個實力派多啲，對自己外形，我會俾七分、唱功就有八分。」
樣與聲，MC說，希望觀眾是因為他的音樂而喜歡「張天賦」，「坦白講，我當初希望成為一個歌手嘅原因，係因為喜歡唱歌，我單純覺得，我應該以唱歌去娛樂別人，more than個樣啦！」
擁有一把識別度高的聲音，MC出道四年，靠這把聲由街頭唱到紅館，剛推出的新歌《百萬大道》更首次參與作曲，「當日簽約時，公司有俾壓力我，佢哋話公司（華納）好多都係唱作歌手，你都要向呢個方向行，我話咁要寫幾多首呀？公司話預寫一百首有兩、三首中啦，呢首歌當俾自己一個功課。我用伴奏網頁試玩，一撳入去聽到第一個伴奏，唔理係咩類型都好，我都照寫，寫咗demo，膽粗粗send俾公司，又竟然用咗。」《百萬大道》內容講青春、講賭博，MC說正是他的心態：「Nothing to lose，當冇咗輸嘅心，咩都敢去賭！」
唱歌技巧無師自通
問MC，最大的籌碼是否把聲？他說︰「我覺得係對唱歌份熱誠，坦白講，把聲絕對會隨住時間，同年紀一路去磨損和消耗，但係唱歌熱誠可以一直保持，就算把聲傷咗或者冇咁好、冇以前咁靚，依然有個心，會有另一個方法去唱、另一個表達方式，我覺得呢個反而比起聲音更加緊要。」
MC的唱歌技巧是無師自通，他說當然有用錯聲的時候，「由我busking到參加比賽，甚至出咗道，好多時候都會有用錯聲經驗，我並唔係好正規跟老師學過唱歌，只是自己去鑽研一個比較正確唱歌方法，所以好多時行多咗好多冤枉路。我覺得作為一個現代流行歌手，要搵一個平衡非常之難，因為你唱得啱又未必一定好聽，唱得好聽呢，又未必一定最保護到聲音，所以要搵到一個平衡點。」
曾經有中學生以《記憶棉》參加比賽，片段在網上瘋傳，MC不惜自揭黑歷史，發放一段青澀自拍短片，全情投入唱出周杰倫的《雙截棍》， MC說︰「感情和技巧，我一定注重感情，《雙截棍》雖然算黑歷史，但呢個係提醒我自己，人會進步，只要你肯花時間、肯練習就會有成果，到呢一刻，我都仲記得當時自拍完的心情，我好自豪覺得唱得好好聽，再去撳熄個錄影掣，跟住就要即刻po上網，當時我係自信心爆棚，依家回顧返，成條片只得自信喺入面。」
問MC哪個演出最深刻？他先嘆一口氣，再說出小秘密，「第一個當然係紅館，但這個深刻原因，因為我人生中未試過，喺台上咁唔享受，真係非常之大壓力，當時換緊衫quick change時，我心入面同自己講『不如唔好做啦，返屋企瞓覺啦』，當然心底裏知道冇得走，真係有一把聲音叫自己逃避，我覺得係一個保護自己嘅感覺，我好少喺台上面係唔享受，緊張還緊張，但去到你唔能夠去享受呢個舞台，我覺得就係一樣好嚴重嘅事，我都搵唔到一個形容詞，總之好擔心、好緊張、好抑壓。」
當時唱片公司沒有因為《This is MC演唱會》的成功，馬上宣布開巡迴，到了今年才開始把演唱會帶到其他地方，如廣州與馬來西亞等地，讓MC「慢慢來」，他說：「去到第二站，先慢慢放鬆，畢竟第一次紅館，太多嘢需要去記，亦係自己一個突破，有咗第一次經驗之後，慢慢就開始享受。」
第二個深刻的舞台經歷，MC表示是小學二年級的歌唱比賽，「嘩，呢個都好深刻，當時小學二年級，報咗社區歌唱比賽，我記得其他參賽者都比我大，已經中學，因為當時比賽冠軍獎品，可以有一年免費唱K，我覺得好正喎，於是膽粗粗報咗，即使好淆底，都硬住頭皮上台，當時唱方大同《Love Song》。」
成為家中經濟支柱
相信當時的MC，也想不到自己日後，真的可以靠唱歌「搵食」，二十七歲仔，入行短短四年，MC已賺到人生第一桶金，他笑言：「咁又好視乎第一桶金係幾多嘅？可以咁講，應該話去到一個自己都估唔到嘅數目啦，可能二十歲嘅自己都估唔到，七年後自己會搵到呢個數目，其實都開心和驚喜。當初簽約，我同經理人講，我話希望可以養到媽咪、養到屋企，我唔怕辛苦，咩都幫我接啦！媽咪兩、三年前都冇做嘢，正式退休了。」成為家中經濟支柱的MC，人也變得踏實，「終於知道，細個唔會明白大人，冇錢咪去銀行撳囉，大個當然知道原來唔係咁簡單，要孭起頭家，唔係淨係搵錢，好多嘢同時要承受，同埋好多嘢要識得計算，但我覺得我個人踏實咗！」問到此刻的目標，MC坦言希望三十五歲前可以退休，「我仲有七、八年時間，咁又好視乎要啲咩退休生活嘅？」
封面攝影協力︰Jack Yuen、Ryan Wong、Jason Ho
花絮攝影︰洪志富
形象︰Nana Wong、Anthony Tong
造型協力︰Music Ho、Ingrid Ma、Kelly Janice
美術設計︰Lily Mak
化妝︰Circle Chong
髮型︰Cliff @Myos
服飾︰LOUIS VUITTON、SHIATZY CHEN、CHEN PENG、HOMME PLISSÉ ISSEY MIYAKE