一連6場《楊千嬅Live My LIVE演唱會》，今晚（4日）迎來尾場，因應大埔宏福苑發生五級大火，造成逾百傷亡，全城哀痛。這次原定為紀念出道30周年的盛會，在肅穆而溫馨的氣氛下舉行，千嬅以30年來的歌曲，轉化為一場療癒心靈的音樂會，為正在療傷的香港送上最真摯的陪伴。
每次紅館開騷，後台都會佈滿一片花海，這次千嬅開騷前，早已呼籲各方好友將祝賀花籃改為救災善款，首場（11月29日）的紅館後台，氣氛也變得更加嚴肅，千嬅的父母、老公丁子高都有到場為千嬅打氣，唱歌老師駐守後台，開騷前為千嬅做開聲練習，這次千嬅除了要顧及演出，亦因為rundown臨時變動，舞台造型連夜改動，將鮮艷顏色的服飾修改，其中一件原為紅色的戰袍，經團隊通宵趕工，化作黑白金三色，在燈光下低調閃耀，樂手們亦一致換上黑色服裝演出。
完成首場演出，千嬅表示︰「第一場嘅感受，其實心情好複雜，帶住好多感覺情感，一剎那會將過去所有由小到大所有畫面，無論演出、演唱會、音樂上面，因為啲歌係覆蓋咗唔同階段嘅自己，再去演繹嘅時候，仲要喺紅館，8年冇上呢個舞台，依家返嚟嘅時候，真係有好多感觸，好似一個好耐冇見嘅朋友，你見返佢嗰種心情！雖然睇落好似好冷靜，但其實係控制住自己，好想俾到呢位好耐冇見嘅朋友，見到自己最好嘅狀態，亦想送上最好嘅表達，可能依家人長大咗，對演出嗰個意義，已經唔係純粹為一個滿足感咁簡單，感恩嘅係，因為咁多人生經歷，我反而更加了解自己，同埋依家呢個半百階段，係同自己最friend嘅時候，我閱讀每一隻歌都好唔一樣。」
開騷前夕，香港發生大型火災，令整個香港罩上一片陰霾，千嬅最希望是陪伴港人一起過度，「我好相信呢一種香港精神，因為我都係喺度長大、喺度出世，所以點解我會懂得呢一種感受，我希望可以用音樂繼續去同大家互相守護，心靈創傷係最難修補一件事，當然所有嘢都真係唔容易，呢條係一條好漫長嘅路，但一定要有一個正能量諗法，相信會做到，要有呢份信念再繼續努力，希望這幾晚我可以用音樂去淡化一啲負面情緒，令大家得到一種溫暖，大家互相陪伴，做一個好嘅聆聽者，都係心靈重建好重要嘅一環。」
