《非份之罪》昨晚（9日）播出第三單元《一億殺機》第一集，飾演「毒舌惡新抱」的陳煒與盧宛茵有連場激烈嘈交戲，各自施展渾身解數，極盡八婆嘴臉，一個手指指鬼咁忟、一個嘴藐藐、面目猙獰兼叉晒腰。煒哥表示與Madam Lo「日嘈夜嘈」好攰：「真係鬧到好攰，同埋其實要鬧同打Madam都好擔心，因為佢始終係前輩，平時我對佢都好恭敬。」
昨晚的焦點場口是李家鼎對著Madam Lo「爆血管式瘋狂咆吼」，以及Madam Lo得悉丈夫與新抱陳煒出軌後、衝入殮房怒摑屍體一幕！劇情講述原本身體極度不適的建國（李家鼎飾），返到家中，遭發癲Mode的妻子淑嫻（Madam Lo飾）咬住唔放，誓要建國在她與新抱之間二揀一，建國忍不住爆seed大嗌「你收聲呀！」終極一吼後便虛脫倒地、一命嗚乎！Madam Lo邊鬧邊怒摑出軌老公屍體一幕，演得甚為逼真。
另外，回憶片段中，有鼎爺向煒哥「霸王硬上弓」的劇情，煒哥透露鼎爺拍攝時緊張到要食鎮靜劑：「鼎爺同我講話佢一介武夫，從來冇拍過牀戲，超驚！所以搞到心跳手震，要食鎮靜劑先掂；所以我拍嗰陣都唔可以太緊張，如果唔係佢仲驚。」
徐榮飾演陳煒丈夫張宏智，智商只有8歲，他坦言難度頗高：「因為我之前都有演過智障人士，所以我今次都要諗啲唔同嘅演繹方法，希望出嚟有新嘅感覺俾觀眾。」由於阿智除了得8歲智商，還是肌肉萎縮症及腦痙攣患者，故在劇中不時會有抽搐及顫抖等動作，對此徐榮表示頗感吃力：「演嘅過程係好攰，因為每次演都要好用力，所以我試過演到條頸抽筋。」徐榮希望透過角色引起外界對相關患者關注：「我感受到佢哋嘅生活好唔容易同唔方便，希望透過角色令到社會多啲人關注同幫助佢哋。」
更多圖輯：
