昨晚（30日）播出的《非份之罪》，劇情講述嘉儀（游嘉欣飾）接到疑似在首集死去的康嘉嵐（戴祖儀飾）報平安的信息，深信家姐尚在人間的嘉儀，前往找嘉嵐的秘密男友Ken（曾展望飾）詢問家姐下落，豈料卻遭Ken禁錮，渣到盡頭的Ken除乘機向康力（吳啟華飾）勒索三百萬，更意圖向嘉儀施暴。
曾展望飾演爛蒲爛玩貪錢Band友，更色心大起，激罕在熒光幕前展現奸險、無賴、衰格的一面，並連環粗暴對待游游；但值得留意的是，GM制服游游期間盡顯敏捷好身手，尤其是一手將游游360度反轉動作，望落孔武有力。
GM受訪時透露當初接到監製王心慰WhatsApp邀請演出時，覺得角色「幾有挑戰性」，他又透露拍攝強暴場口好有難度：「我第一次拍咁多動作戲，仲要唔係只係打兩吓，我哋喺個Band房度拍，有好多道具，我同游游打完交之後，我就要攞啲結他線綁住佢、之後再單手撳低佢再『的』佢去梳化，呢一連串動作可以話係演藝成就解鎖，當然好多謝當時嘅武指，佢喺好短時間內令我明白咗動作戲嘅真諦，就係要俾啲力真做。」
GM最初擔心會弄傷游游，所以就住就住，「但原來唔真做俾啲力落去，反而拍多咗Take仲易令對手受傷，所以拍之前，我都有同游游講話我哋真係俾力試一次喇。」
更多圖輯：
