我神經緊張的撳着衫袋內，蓋大班的手指，有如真的在保護被制裁緝捕他的對頭人，斬下來的手指。少有的直筆甩，句句精簡，我才知道，過去幾個禮拜，風花雪月，在奥斯陸上山落地的是孝活和我，同期間在北歐幾個城市左閃右避，天未光又要聞風走路的是這個食慣肥豬膏的難弟，語氣完全似另外一個人。我已無心機去神神秘秘，漏夜兩父子開車去太子女「棚尾拉箱」準備好的地下辦公室，進行無人能追蹤根查到的視像通話，蓋仔的巨型大頭在六十吋的畫面彈出來，幸好不是喪家狗的面口。
「哈，你就兩仔爺愈嚟愈似孖生兄弟。」
「阿蓋世太保，你做乜都精甩邊，但個世界變晒，對你好定唔好嘅人，信唔過㗎，隨時會陰你會出賣你……」
「蓋Uncle，頭呢五分鐘，追蹤晤到我哋啲視訊，你講咗啲緊要嘢先，等我哋去做。」
「咁快啲講，得番三兩分鐘咋。」
「哈哈哈，我哋大家未必會再見到㗎啦，我阿媽真本事，搞掂你哋有大有細咁多個，佢真心錫你哋，佢好憎我自細乜都叻唔切，激到佢死死吓，我本來想今次用法子兜返嚟大馬，飲阿二撇雞你肯娶番個好老婆呢一餐，如果到時穿煲走唔甩，可以索性匿喺度，我阿媽實好開心……係咪乜都我講晒呀……哈……阿孝活仔又認番個咁臭檔嘅老竇，我阿媽成日頂你唔順，但都話，佢變番細廿歲就幾大都追你……哈哈哈……」
「Uncle，夠鐘咁滯啦！」
「唔好斬纜，我哋扮唔識嘅嚟繼續講嘢。」
「算喇，當正唔知我生定死，唔好話俾我阿媽知，當正我會返嚟飲，到時見我唔到，大家得啖笑，預咗我份人係咁冇厘搭霎……代我錫阿未來阿嫂一啖，孝活，你趕得切，你有個好老竇，佢有個好仔……做乜搭錯線？我同阿Lady GaGa講緊嗰喎……超……」
熒幕一黑，我心一噏。我之所以有今日，蓋太保才是扯頭纜的貴人。「放心，我有法子追蹤到Uncle。」孝活向我身後，聲氣突變，「Pamila，你話唔嚟又過嚟嘅？」到我轉身，面青口唇白的哎吔家姊，捉着太子女的手臂，東張西望這個先進的地窖。「呢個地方咁隔涉，但又幾骨子喎……」她的若無其事，我已見過一百零八次，但這次最令我雙重心噏，完全不敢插口。「Auntie你咁鍾意睇番啲舊戲，如果你嫌酒店房啲電視畫面細，得閒車你嚟，你睇呢個幾大……」太子女當然知道要打救我兩父子，犯不着還裝作若無其事，說什麼都慢了半拍。「好呀。我好憎喺啲手機睇嘢，第時喺度睇番阿細佬你結咗婚呀，阿ＢＢ又走走吓呀，我個孫又喺三藩市畢業呀，阿孝活愈做愈好呀，唔知佢有冇咁好彩同你拍到拖呀……大大個頭咁，我攤喺梳化度睇，咁最好啦……」已一面垂垂臥下在長沙發，不約而同齊齊問：「想飲啲乜嘢呀？」
「咖啡？」
「有威士忌呀？」
「唔使……邊個鍾意走先，就走先啦……我好耐冇飲過熱水啦，俾杯熱嘅……過我……」