Aska張馳豪推出全新單曲《樂活道》，作為他第三首跳舞歌，今次決定「變曳」突破自己，展現有別於以往的型格一面。MV邀得擁有600萬粉絲的網紅「貓爺」客串，Aska與女主角更有火辣貼身舞及近距離親密鏡頭，畫面極具張力。
雖然Aska在MV中型仔十足、表情煞食，但原來他當時抱病上陣，開拍前更要食退燒藥頂住。他透露：「連續幾日發燒，今次真係頂硬上！好耐未試過病到咁嚴重。平時我都唔睇醫生，之前小病都係食成藥休息下就好，但今次真係太辛苦。」即使身體抱恙，Aska沒有絲毫怠慢，拍攝前一日仍在加緊排舞：「今次隻舞好多footwork，練咗2、3個禮拜，對我嚟講係個新挑戰。」他笑言雖然休息時間充足，但睡眠質素欠佳：「呢幾日盡量瞓多啲，同埋有戴Sleep Tracker，佢話我呢兩晚特別差，雖然瞓嘅時間好多，但壓力高、深度睡眠好少，佢都真係幾準，哈哈！」MV拍攝至凌晨，他全靠腎上腺素撐住：「只要一唔roll機我就休息保留體力。」
新歌營造夜晚氛圍，MV特意到尖沙咀酒吧取景，Aska與女主角有多場親密互動。被問到會否尷尬或需要事前破冰熱身，他說：「冇特別點熱身，大家都好專業，一埋位就根據導演要求去演。」他亦分享新歌主題構思：「因為公司話我唔夠曳，覺得平時個形象太死板！我就諗點樣可以突破自己，畀個新鮮感大家呢？所以主題上就直接啲，有一個對象喺入面，歌詞係向嗰個對象講嘅嘢，而對方又想同我發展，一齊去探索呢段關係。」
