很多人都說柯煒林在新一代男演員中，最有機會成功接班。柯煒林半笑半認真反問：「究竟係邊個講呢件事？邊個覺得？我冇聽過囉！」今年31歲的他，很認真的再說：「我喺20歲出頭嘅時候，決定做一個演員。無論問我幾多次，都係一個慾望驅使，呢個係比較小我嘅東西，唔係話我要成就一件咩大事。」柯煒林說，一直只想拍一些屬於香港的東西，「我好喜歡電影呢個媒介，我係一個土生土長香港人，所以我第一個途徑會去諗，就係拍香港嘅嘢！」
https://www.youtube.com/watch?v=aLGd9PkIZyg從拍《鮮浪潮》短片起步，一步一步走到《濁水漂流》「木仔」令人眼前一亮，再到今年的《別叫我」賭神」》與發哥周潤發演父子戲，柯煒林說，很高興可以「被看見」，「我覺得自己很幸運，一開始由大學讀書就拍不同《鮮浪潮》短片。我尋日有一個機會，睇返自己當時拍嘅其中一段，冇公開過嘅，係一個師兄嘅畢業作品，佢要交功課，搵我去做其中一個cast，我哋好似放咗入Time capsule開返出來，由那個契機開始，我拍咗其中一段《鮮浪潮》短片叫《如霧起時》，才決定做演員。原來都接近有十年，拍《點五步》嘅時候係14年，跟住16年上映，我才當自己出道。我只可以講我很幸運地，喺唔同媒介下有演出，然後被看見。」
重溫港產片盛世
慾望驅使柯煒林成為演員，到底是什麼慾望？「一件很簡單嘅事，佢（電影）令我感受到生命！第一次拍《鮮浪潮》短片《如霧起時》有一場戲，我唔識得演，NG咗好多次，成個人很騰雞，然後導演同副導演，捉住我再講解，返去再拍嘅時候，我feel到係一個good take，我等導演講good take嗰一個moment，好似好耐，但其實很短幾秒嘅事情，到佢一講good take，我起雞皮！其實就係因為呢個原因，我稱之為自我滿足，我就係追緊呢個起雞皮，起多一次雞皮，我希望演戲上可以起多一次雞皮！」在片場真實得血淋淋，那次至今，柯煒林未再試過起雞皮的感覺。
拍《別叫我」賭神」》其實比《濁水漂流》還要早，當時拍住發哥、智叔，令柯煒林復刻了一次港產片盛世的感受，「因為拍了《別叫我」賭神」》經歷咗幾個月，見到不同前輩點樣去工作，好似突然之間偷看到佢哋喺港產片，八九十年代盛世時候嘅規模，突然之間見過大蛇屙尿係啲咩！當時好緊張，我問過發哥，當時我應該係25歲，我問佢，發哥你喺我呢個年紀嘅時候，有冇試過緊張或者害怕，佢同我講咗一句『魚唔過塘唔會肥』，發哥都係咁樣走過來，好年輕已經進入電視台，然後慢慢一步一步走出自己一條路。」
柯煒林愛香港也愛香港電影，小時候逢周末到外婆家，電視常會重播《少林足球》、《鍾無艷》等港產片，「《少林足球》係我喺巴倫紐戲院（屯門）睇，我好記得坐第一排好前，而且係午夜場，好難得地父母帶咗我哋成家去睇，冇諗過喺普通戲院有IMAX感受！到中學我喜歡《六樓后座》嗰種青春戲，同時又會睇《新紮師妹》、《玉女添丁》呢啲愛情小品；到入大學由於我讀創意媒體（城大），覺得需要裝一個文青樣，開始睇一啲唔同類型嘅戲，開始睇杜Sir（杜琪峯），杜Sir嘅戲係大學先睇，我好鍾意《柔道龍虎榜》，嗰種對於自由不顧一切嘅渴望同執着，好杜Sir風格。」
人生第一次看的三級片，竟然是《志明與春嬌》。「嗰時聽到彭浩翔導演呢個名字，會覺得識佢係有品味嘅，作為一個仲讀緊中六七嘅時候，會覺得自己跟其他人唔同，覺得自己聽過彭浩翔呢個名字，入咗大學先發覺，原來班入面全部都識，仲識得更多，我先慢慢去睇其他電影，追回新浪潮嘅導演，許鞍華導演嘅《胡越的故事》係其中一套我好鍾意，仲有譚家明導演嘅《烈火青春》。」
成為一個unique演員
當年看《胡越的故事》年輕時期的發哥，誰會想到三十多年後，會在《別叫我」賭神」》演他兒子。拍完發哥，今年底上映的大片《金手指》，柯煒林面對的，是梁朝偉與劉德華。「我飾演一個under劉生（劉德華）嘅幹探，但我記得當時我做得唔好，我唔識得做，慶幸戲分唔係好多！其實好多時候，拍完一個作品，我都keep住懷疑自己得唔得㗎？」
說到今年最愛的港產片，柯煒林投《白日青春》一票。吸引他的，原來出自《濁水漂流》同一個攝影師梁銘佳，「佢嘅影像不只好睇，因為《白日青春》同《濁水漂流》有一點點共通處，都係講香港低下階層故事。你會睇到佳哥（梁銘佳）有個溫度，嗰個小小觸感，唔係每一個攝影師都有嘅一個風格，撞啱佢好適合我嘅口味。」
柯煒林的口味，最想成為一個獨一無二的演員，「另一個的說法係，香港電影會死，香港電影容易死呢件事，經常都被人問呢個問題，但係呢啲問題喺我腦入面，從來都冇響起過。對於我來說，無論香港電影死定唔死，我都係會做，所以接唔接班，我都係希望可以繼續做，希望有一個好劇本，遇到一個好導演，然後去拍，呢個係我自己比較core嘅想法，多過話我要成為邊一個接班人，因為我鍾意嘅演員，全部都好獨特，我都希望自己，可以成為一個好unique嘅演員。」更多「雙林」鮮浪潮對談內容，詳情刊登《明周》55周年紀念特刊。
後記：
在9月中的一個早上十一時半，柯煒林提早到達柴灣影樓先行妝髮，期間一直手拿一本《樹的憂鬱》默點地看，他說是近來十分喜愛的小說，關於去與留。
袁澧林則準時十二時到達現場，在另一角準備妝髮，仍睡眼惺忪的她，與公司同事討論工作行程。今次她真的是「百忙抽空」拍攝，因為翌日便要飛到丹麥哥本哈根出席電影活動，出發前的上午仍要為另一家傳媒訪問。
柯煒林與袁澧林，性格戲路劇種截然不同，卻有那麼一點點的接連，俱是近年最耀眼的新生代，沒有之一。「同一條腸出」的《濁水》與《窄路》，幾乎都直接或間接，影響了大家的生命軌跡，一個想「起多次雞皮」，另一個要向《Barbie》取經。好戲，陸續有來。
撰文：文嘉龍
協力：張佩芳、溫敏芝
攝影：TMT、洪志富（花絮）
攝影協力：FEILUNG、WUHOSUN
造型：NANA WONG
造型協力：CHLOE NG
化妝：Jenny Shih（Angela）、Tammy Au （Will）
髮型：Lupus_chui@ orient4（Angela）、Oscar Ngan（Will）
(On WILL)
FERRAGAMO
COAT
SHIRT
PANTS
TIE
SHOES
FENDI
COAT
PANTS
RING
LOUIS VUITTON
MNG QUILTED OVERSHIRT
WORKWEAR CUFFED PANTS
SNEAKERS
(ON ANGELA)
FERRAGAMO
BLAZER
SHORTS
LOUIS VUITTON
BLOSSOM SANDAL
BOUCHERON
Plume de Paon Large Ring
FENDI
DRESS
FENDI
TOP
KNIT
PANTS
