楊千嬅《Live MY LIVE 1.0 世界巡迴演唱會》正式展開，上周六（11日）於成都東安湖體育公園主體育場舉行一連兩場，吸引接近七萬觀眾進場，今次演唱會亦寫下新記錄，千嬅成為首位以全粵語歌單，在內地體育場級別演出中，達成雙場售罄的女歌手。
相隔一年再到成都開唱，今次在可容納三萬五千人的體育場舉行，千嬅不單要適應戶外延伸舞台設計，由於舞台加闊和走位距離倍增，機關處處，考驗的不止是唱功，亦同時考驗體能與專注。
除了應付唱歌演出部分，千嬅坦言戶外場地需要很大集中力，體能亦要加倍，「所以早咗到成都排練，戶外大場真係要用好多能量、體力和精神，舞台又多機關要特別留神，好彩天氣未算太熱，但已經開始做好夏天戶外氣溫炎熱嘅心理準備。」她今次開騷前預留時間warm up，希望保持靈活性以減少拉傷，「多咗唔同機關，多咗兼顧，都要多啲時間同場地適應。」
這次巡演，除了是千嬅個人挑戰，也非常需要團隊的支持、觀眾的互動支撐，千嬅笑說老公丁子高的崗位最重要，「有時突然之間有靈感好想試，好彩丁生喺度控制大局，分得好清楚理想和現實，做到定做唔到？亦都幫我情緒管控，你知去到我依家有少少嗰啲年紀轉接期，賀爾蒙有啲唔同，哈哈！」
今次巡演距離上次的紅館騷，只有短短四個月，千嬅解釋︰「上年紅館檔期係突然嘅，咁啱趕上30周年，內容亦為香港全新編排，真係好多好多感受喺裏面！然後呢，其中一個主辦單位就問，不如我哋即刻將個紅館騷巡演啦，我都有考慮一陣，一方面我覺得呢個香港演出既然咁多感受，我唔想一下就冷卻呢份情感，而且《MY TREE OF LIVE》和《Live MY LIVE》係有連貫，好啦，最後就決定做，不過都要再調整一下內容先。《MY TREE OF LIVE》係去到各地經歷完後得到嘅養分，由一粒種子變做一棵樹的過程，最後成為『回家』嘅《Live MY LIVE》，今次1.0叫做前傳，唔再慶祝周年，係講終於可以等到『回家』之前嘅感受，例如面對困難、面對恐懼，係比較深層次，去到我依個年紀，或者同步成長嘅歌迷，佢哋應該最容易投入到和感受到。我想同一直支持我嘅歌迷講，我搵到行返屋企嘅力量，亦搵到點亮你哋嘅光，呢幾年我去咗唔同地方唱歌，累積咗好多感悟，所以我想將呢個故事延續落去。」
成都之後，《Live MY LIVE 1.0》暫時落實將會到杭州、深圳、湛江、長沙和廈門，千嬅說︰「暫時冇諗做幾多場呀，但有一啲自己未去過開演唱會嘅地方想去！上次巡演感受最深，係將自己廣東歌帶到唔同地方，幾萬人大合唱真係好感動，帶俾我好多能量。」
今次成都首站，演唱會結束亮燈後，三萬多粉絲留守場地自發大合唱《舊地》，雖然千嬅已離場，但事後看到這個片段令她十分感動，「成都歌迷十分熱情，今次喺商場自發搞咗個好大嘅應援，我去到都嘩一聲，仲大過以前唱片公司搞嗰啲唱片宣傳，真係好多謝佢哋，幫我留咗好多溫暖嘅回憶。」
