踏入新一年，楊千嬅送上全新單曲《回歸一塊小石頭》。她表示這首歌，承載了她入行多年來對生命的深刻體悟。日前她更遠赴北京，在一座古樸的四合院內，舉行了一場別開生面的網上直播音樂會，與合作無間的香港演唱會團隊，一起在紛飛的雪花下，以歌聲與樂迷進行了一場小形音樂會直播，唱了四首歌及網上直播與歌迷聊天。
楊千嬅表示，農曆新年可以休息，跟家人度新春，兼再放自己多一個假期，與老公即興快閃飛去泰國度假，休息過後就要開始收心養性，減吃減喝，為下半年度新的世界巡迴演唱會作籌備。「真係好耐冇去過泰國，所以我好似發現新大陸咁，覺得自己超大鄉里，咩都嘩，原來變咗咁多！嘩，原來咁多好嘢玩、咁多好嘢食，哈哈！」有冇肥到？「梗係有啦！唔怕啦，我好快收心養性。最開心係喺曼谷不斷有遇到朋友，又再不停同我食飯慶祝生日，冇諗過喺曼谷都食咗三個蛋糕！哈哈！」
泰國返來之後，千嬅就飛北京為新歌及之後的巡演做宣傳，「由42度變零下2度，即刻覺得自己冷縮熱脹下，瘦返少少，哈哈！諗都冇諗過，北京仲遇上第一場春雪！第一次遇春雪呀，唔係太凍但又好靚，所以好難忘。直播喺四合院做，我成個香港演唱會團隊飛晒過去幫手，襯埋個天落咗白雪，好有feel！喺一個咁嘅環境之下，唱咗新歌，同三首舊歌，呢個『別開新穎』的企劃，我人生都係第一次，綵排動用了幾十個機位，又打燈又設計走位路線，我站喺雪地，唱《自由行》個陣，依家諗返都覺得好難忘，勁有feel！」
談到新歌《回歸一塊小石頭》，她透露這首歌，其實是早在《MY TREE OF LIVE巡迴演唱會》期間已經萌芽，當時樂隊成員葉崇恩創作了一段用於《小城大事》間場換衫時的音樂，她在台底聽到這段旋律，都覺得十分動聽，而萌生念頭：「咁好聽，應該可以發展成一首歌。」終於，她鼓起勇氣向葉崇恩提議，能否將這段間場音樂，延伸創作成一首完整的歌曲。葉崇恩更找來Robynn（葉中月)一起參與，希望從女性角度注入更多細膩情感，千嬅一聽成品便即「收貨」。
千嬅表示，成首歌核心寄託在「一塊小石頭」的意象上，最打動她的，正是那份「回歸小石頭」的坦然，「呢句『回歸一塊小石頭』好touch到我，所以連歌曲的封面照，我親自堆砌石頭，其實好有人生哲學，你係咁砌，好多時砌極最後都係跌晒落嚟。其實生命過程就似叠石咁，冇得plan，慢慢向着自己喜愛、向夢想目標行，大力吸多啖氣，都可能又要由頭砌過，砌砌下，我領悟到，人呀，唔好諗咁多『然後』，唔使咁執著，享受個過程，心要知道安靜，時間自然會話俾你知，最後答案。」
