太極樂隊《太極RAINBOW AFTER RAIN演唱會》將於8月7-8日舉行，日前隊友齊集為個唱開會，討論新一輯廣告動畫，眾人容貌4秒後慢慢變老「36年」成為真正的「90後」（90歲後）。
主音雷有輝大爆隊友Ricky「出蠱惑」，要求設計師幫手出術：「我哋每一個都變晒90歲嘅樣，淨係佢一個人揀張咁後生嘅相，睇落同依家都冇咩分別咁，可能佢都知自己擺唔耐，未必有90歲命掛？其實變老好容易，我哋做少幾次Mask、唔化妝都可能有呢啲效果。」
Joey Tang就話比自己個樣嚇親，笑言有「趕客」成分：「初初諗邊個咁大整蠱啊？原來係由老變後生，咁都好啲，因為有比較，依家睇落仲靚仔咗好多！今次個騷好多Gary生前嘅好朋友都話想幫手，所以好多人都嚟支持。呢一刻我地仲未綵排，但都唔習慣冇咗佢，每一個細節都預佢一份。」
Hi-Fi德就叫太極Fans積極撲飛，直言未知何時會再搞個唱：「依家世界日日改變，呢個騷都因為病毒延期咗幾次，下次再聚都唔知幾時，可能要到30年後先有機會搞，到時我哋仲未死又行得郁，再唱比大家聽囉！」
