踏入人生新階段的周柏豪，今年已經40歲，之前一直在內地做巡迴，終於相隔七年落實在香港開個人音樂見面會《周柏豪 THE BLOOMING CHAPTER》，更選定白色情人節跟粉絲見面，他直言：「相隔七年，真係有啲耐，屋企人呀朋友呀都問，你幾時巡返香港呀，終於定到啦，終於可以好開心同大家講，今次由香港出發！第一站就係香港！」見面會的海報，非常有春天氣息，柏豪表示，「對男人來講，我到了四十歲呢個年紀，我估應該展現到唔同的一面俾大家，一個新嘅綻放，所以我哋海報都係用綻放為題。」
第一站香港，柏豪表示有好多新構思，之前的巡迴見面會已經做了近兩年，巡了好唔同城市，「26年新的一次巡迴，喺自己屋企第一站，個騷內容同製作，真係愈搞愈大，因為喺香港做騷限制同外面不同，好多嘢可以玩，所以我可以同定歌迷講，今次係同上年個巡迴好唔同，規模與內容不斷豐富升級，完全不會比正規演唱會『少嘢睇、少歌聽』，甚至在心思、時間和力氣的投入上我覺得重比以前演唱會多。」
他自言放下一千分的力，全情投入跟導演研究，精心設計左好多新環節。問到他有咩新刺激在香港玩，除衫，插水？吊威也？柏豪笑道，「係喎，我都見到上次Tyson玩插水，如果我跳落台，大家係肯定接得住我，我唔怕跳㗎…哈哈。吊威也我都想呀，成日都好想試吓台前拂去觀眾席個種感覺㗎！」
他又表示選址於啓德體藝館，也是他與團隊一起挑選，因為體藝館給他的感覺是非常有活力及繽紛多采，其前身為啓德機場的歷史背景，也讓他感到格外有趣：「我未喺啓德搭過飛機，所以對我嚟講，真係一個好有趣嘅地方。」香港站之後，周柏豪會繼續世界各地新一輪巡演，「我係充滿期待㗎，今次會再去啲新城市，演出之餘，又可以體驗不同文化旅程，讀萬卷書不如行萬里路嘛。」
