李司棋今日（7日）出席活動發布會，她說自己都是半退休人士，所以每日慳得就慳，「我希望大家聽到都開心，對退休長者係一個好消息，每日都可以慳得就慳，我自己就半退休，以前就會買啲無謂嘢，買完返屋企就後悔，同自己講唔會再買，手袋呢啲不在話下，但有時會買公仔，年紀大有時會有情意結。以前因為衫多，會租貨倉擺嘢，但依家唔會，因為去貨倉好似去考場咁，要有好好體力，搬東搬西，後來發覺有啲衫搵出嚟，只可以著到一半，好多都係80年代，真係太多嘢，之後慢慢開始送俾人，令自己罪惡感冇咁大，但有啲有紀念價值嘅衫就保留，好似選香港公主當晚套晚禮服都唔捨得掟，會好好保留。」
近年司棋姐殺入KOL界，獲獎無數同樣值得保留，「近年開始做IG後，都攞到啲獎就唔捨得掟，因為冇諗過自己會拍片，我以前係唔會揸相機出街嘅人，就算去日本旅行都冇帶相機，唔會影相留念，但依家就會拍下嘢，大家都會用手機拍啦，有時網上見到大家嘈交，真係忍一忍，會俾人影低，睇到就覺得唔值，真係會俾人影㗎！」
對於李家鼎託付李泳豪為執行人，更指身家被大孖榨乾榨淨，司棋姐表示，希望一家人可以用愛去解決問題，「佢哋會有辦法解決，有樣嘢係愛，豪仔本身係好有愛，佢一定可以用佢嘅愛，去建立返家庭！老人家話人心肉做，可能有時會聽太多，想法會偏向一邊，相信慢慢會明白，可以用愛同時間，大家一家人，本是同根生。（鼎爺瘦咗好多？）點解會咁瘦？要注意下，依家因為太多人關心佢，暫時我哋唔應該搵佢。」
更多現場圖輯：
